ජපාන යෙන් මුදලේ අගය තවදුරටත් පහත වැටීම සම්බන්ධයෙන් රජය දැඩි අවධානයෙන් පසුවන බවත්, අවශ්ය ඕනෑම අවස්ථාවක මුදල් වෙළඳපොළට මැදිහත් වීමට සූදානම් බවත් ජපාන මුදල් අමාත්ය සත්සුකි කටයාමා මහත්මිය පවසයි.
නිතිපතා පැවැත්වෙන මාධ්ය හමුවකදී අමාත්යවරිය අවධාරණය කළේ, යෙන් මුදලේ අගය සම්බන්ධයෙන් ජපාන රජය ඇමරිකානු බලධාරීන් සමඟ ඉතා සමීපව සහ නිරන්තර සම්බන්ධතාවයකින් කටයුතු කරන බවයි. විශේෂයෙන්ම ඇමරිකානු නිවාඩු දිනවලදී පවා මෙම සම්බන්ධීකරණය පවත්වාගෙන යන බව ඇය සඳහන් කළාය.
පසුගියදා යෙන් මුදලේ අගය වසර 40ක අවම අගයක් වන 162.84 දක්වා පහත වැටීමෙන් අනතුරුව, නැවතත් එය යම් තරමකින් ඉහළ ගියේය. අද (03) වන විට යෙන් එකක් ඇමරිකානු ඩොලරයකට සාපේක්ෂව 161.2ක අගයකින් වෙළෙඳාම් විය.
මේ අතර, ජපාන රජයේ බැඳුම්කර (JGB) අස්වැන්න වසර 30ක ඉහළම අගයකට ළඟා වී ඇති අතර, එය ජපාන ආර්ථිකයේ මූල්ය ස්ථාවරත්වය පිළිබඳ ආයෝජකයින්ගේ බියට හේතු වී ඇත. රාජ්ය මූල්ය පද්ධතියේ තිරසාරභාවය සහ බැඳුම්කර වෙළෙඳපොළ කෙරෙහි විශ්වාසය තහවුරු කිරීමට රජය කැපවී සිටින බවද අමාත්යවරිය වැඩිදුරටත් අවධාරණය කළාය.
