22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතේ ව්‍යවස්ථානුකූලභාවය අභියෝගයට ලක්කරමින් ශ්‍රේෂ්ඨාධිකරණය හමුවේ ගොනුකර ඇති පෙත්සම් සම්බන්ධයෙන් ලිඛිත දේශන ඉදිරිපත් කිරීමට ලබාදී තිබූ කාලය අද පස්වරු 3.00ට අවසන් වී තිබේ.
කෙසේවෙතත්, ශ්‍රී ලංකා නීතීඥ සංගමය ඇතුළු පෙත්සම්කාර පාර්ශ්ව කිහිපයක් අදාළ පෙත්සම් සම්බන්ධයෙන් ලිඛිත දේශන ඉදිරිපත් නොකරන බව මෝසම් මඟින් ශ්‍රේෂ්ඨාධිකරණයට දැනුම් දී ඇත.
22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතේ ව්‍යවස්ථානුකූලභාවය අභියෝගයට ලක්කරමින් පෙත්සම් 67ක් සහ අතරමැදි පෙත්සම් කිහිපයක් ශ්‍රේෂ්ඨාධිකරණය හමුවේ ගොනුකර තිබුණි.
අදාළ පෙත්සම් ඉකුත් සැප්තැම්බර් 01 වැනිදා අගවිනිසුරු ප්‍රීති පද්මන් සූරසේන මහතා ප්‍රමුඛ පංච පුද්ගල විනිසුරු මඩුල්ලක් හමුවේ කැඳවූ අතර, පෙත්සම් විභාගය පූර්ණ විනිසුරු මඩුල්ලක් හමුවේ සිදුකරන ලෙස පෙත්සම්කාර පාර්ශ්ව කළ ඉල්ලීම එහිදී ප්‍රතික්ෂේප කර තිබේ.
ඒ අනුව පංච පුද්ගල විනිසුරු මඩුල්ල හමුවේ දින දෙකක් පුරා පෙත්සම් විභාගයට ගත් අතර, එම විභාගය ඊයේ පස්වරුවේ අවසන් විය. අනතුරුව සියලු පාර්ශ්වයන්ට ලිඛිත දේශන ඉදිරිපත් කිරීම සඳහා අද පස්වරු 3.00 දක්වා කාලය ලබාදී තිබුණි.
මේ අතර, පූර්ණ විනිසුරු මඩුල්ලක් පත්කිරීමේ ඉල්ලීම ශ්‍රේෂ්ඨාධිකරණය විසින් හේතු දැක්වීමකින් තොරව ප්‍රතික්ෂේප කර ඇති බව පෙත්සම්කරුවන් සිය මෝසම් මඟින් අවධාරණය කර තිබේ.
එමෙන්ම රජයේ පාර්ශ්වයේ නීතිඥවරුන් කරුණු දැක්වීමෙන් අනතුරුව වාචික ප්‍රතිචාර දැක්වීමට තමන් කළ ඉල්ලීමට අවසර නොලැබීම හේතුවෙන් රජයේ කරුණු සම්බන්ධයෙන් පැහැදිලි කිරීම් සහ ප්‍රතිතර්ක ඉදිරිපත් කිරීමට අවස්ථාවක් නොලැබුණු බවද පෙත්සම්කරුවන් පෙන්වා දී ඇත.
මේ අතර, 22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතේ ව්‍යවස්ථානුකූලභාවය සම්බන්ධයෙන් පංච පුද්ගල ශ්‍රේෂ්ඨාධිකරණ විනිසුරු මඩුල්ලේ නිගමනය රහසිගතව තබාගෙන, යථාකාලයේදී ජනාධිපතිවරයා සහ කථානායකවරයා වෙත දැනුම්දීමට නියමිතව ඇත.
