තමිල්නාඩු ප්රධාන අමාත්ය සී. ජෝසප් විජේ විසින් චෙන්නායි නගරය කේන්ද්ර කරගනිමින් ලෝක මට්ටමේ ඔලිම්පික් නගරයක් මෙන්ම Formula 1 ඇතුළු මෝටර් රථ ධාවන තරග පැවැත්විය හැකි ජාත්යන්තර මට්ටමේ මෝටර් රථ ක්රීඩා නගරයක් ඉදිකිරීමට දැවැන්ත සැලසුමක් ප්රකාශයට පත් කර තිබේ.
2026 සැප්තැම්බර් 3 වනදා ව්යවස්ථාදායක සභාවේදී 110 වගන්තිය යටතේ විශේෂ ප්රකාශයක් සිදුකරමින් මෙම සැලසුම් ඉදිරිපත් කර ඇති බව සඳහන් වේ.
තමිල්නාඩු ක්රීඩා සංවර්ධන අධිකාරිය හරහා ක්රියාත්මක කිරීමට නියමිත ඔලිම්පික් නගරය ජාත්යන්තර මට්ටමේ ක්රීඩාංගණ, නවීන ක්රීඩා උපකරණ, ඉහළ කාර්යසාධන පුහුණු මධ්යස්ථාන, ක්රීඩා විද්යා සහ ක්රීඩා වෛද්ය මධ්යස්ථාන ඇතුළත් ඒකාබද්ධ ක්රීඩා සංකීර්ණයක් ලෙස ඉදිකිරීමට සැලසුම් කර තිබේ.
එමෙන්ම ක්රීඩක ක්රීඩිකාවන් සහ පුහුණුකරුවන් සඳහා නවාතැන් පහසුකම්ද මෙම සංකීර්ණයට ඇතුළත් කිරීමට නියමිතය. තමිල්නාඩුවේ ක්රීඩකයන්ට ඔලිම්පික් සහ අනෙකුත් ජාත්යන්තර තරගාවලි සඳහා වඩාත් විධිමත් පුහුණුවක් ලබාදීම සහ ජාත්යන්තර මට්ටමේ පදක්කම්ලාභීන් බිහිකිරීම මෙම ව්යාපෘතියේ ප්රධාන අරමුණක් බව සඳහන් වේ.
මීට අමතරව රුපියල් කෝටි 1,200ක පමණ පිරිවැයකින් සහ වර්ග අඩි ලක්ෂ 20ක පමණ භූමි ප්රමාණයක නව ඒකාබද්ධ ලේකම් කාර්යාලයක් සහ ව්යවස්ථාදායක සභා සංකීර්ණයක් ඉදිකිරීමටද යෝජනා කර තිබේ. වර්තමානයේ පවතින ඓතිහාසික ෆෝට් ශාන්ත ජෝර්ජ් සංකීර්ණයේ ඉඩකඩ සීමාවන් සැලකිල්ලට ගනිමින්, ඉදිරි වසර සියයක පරිපාලන අවශ්යතා සපුරාලිය හැකි නව පරිපාලන මධ්යස්ථානයක් ලෙස මෙය සංවර්ධනය කිරීමට සැලසුම් කර ඇත.
මෝටර් රථ ක්රීඩා නගරයද මෙම දැවැන්ත සැලසුමේ තවත් ප්රධාන අංගයකි. Formula 1 සිට Formula 4 දක්වා ධාවන තරග පැවැත්විය හැකි නවීන ධාවන පථයක් සහ පුහුණු මධ්යස්ථාන එහි ස්ථාපිත කිරීමට අපේක්ෂා කෙරේ.
තමිල්නාඩුවේ ශක්තිමත් ද්වි රෝද සහ චතුර් රෝද රථ නිෂ්පාදන කර්මාන්තය මෙන්ම කොයිම්බතූර් ඇතුළු ප්රදේශවල පවතින මෝටර් රථ ක්රීඩා පරිසරයද ප්රයෝජනයට ගනිමින් තරුණ ධාවකයන් හඳුනාගෙන ජාතික හා ජාත්යන්තර මට්ටමේ ශූරයන් බවට පත් කිරීම මෙම ව්යාපෘතියේ අරමුණක් බව සඳහන් වේ.
මෙම මෝටර් රථ ක්රීඩා නගරය හරහා සංචාරක ව්යාපාරය වර්ධනය කිරීම, මෝටර් රථ නිෂ්පාදන ක්ෂේත්රයට නව ආයෝජන ආකර්ෂණය කරගැනීම සහ රැකියා අවස්ථා වැඩි කිරීම ඔස්සේ තමිල්නාඩු ආර්ථිකයටද සැලකිය යුතු ප්රතිලාභයක් ලබාගැනීමට අපේක්ෂා කෙරේ.
හිටපු සිනමා නළුවෙකු වන විජේ 2024 වසරේදී තමිළග වෙට්රි කසාගම් පක්ෂය පිහිටුවමින් ක්රියාකාරී දේශපාලනයට පිවිසියේය. ඉදිරිපත් කර ඇති මෙම දැවැන්ත ව්යාපෘති හරහා තමිල්නාඩුව ක්රීඩා, මෝටර් රථ කර්මාන්තය සහ පරිපාලන යටිතල පහසුකම් අතින් නව මට්ටමකට ගෙන යාම ඔහුගේ පාලනයේ ප්රධාන ඉලක්කයක් බව පෙනී යයි.
ඉන්දියාවේ Formula 1 ඉතිහාසය දෙස බැලීමේදී 2011 සිට 2013 දක්වා උත්තර් ප්රදේශ්හි Buddh International Circuit ධාවන පථයේදී ඉන්දීය Grand Prix තරග පැවැත්වුණද, පසුව බදු ගැටලු සහ අධික පිරිවැය හේතුවෙන් එය නතර විය. 2028 වනවිට Formula 1 තරගාවලිය නැවත ඉන්දියාවට ගෙන ඒමේ ජාතික උත්සාහයක්ද පවතින පසුබිමක තමිල්නාඩුවේ නව මෝටර් රථ ක්රීඩා නගර යෝජනාව ඉදිරිපත් වීම විශේෂත්වයකි.
