පෘතුගාල පාපන්දු තරුව වන ක්රිස්ටියානෝ රොනාල්ඩෝ ප්රකාශ කර ඇත්තේ, මෙම ලෝක කුසලාන තරගාවලිය තමා සහභාගි වන අවසන් ලෝක කුසලානය වන බවයි. පෘතුගාලය සහ ස්පාඤ්ඤය අතර පැවැත්වෙන වට 16 දෙනාගේ තරගයට පෙර රොනාල්ඩෝ මේ බව සඳහන් කළේය.
මෙම තරගාවලියත් සමඟ ලෝක කුසලාන හයකදී තරග වැදුණු ක්රීඩකයෙකු ලෙස ඉතිහාසයට එක්වූ 41 හැවිරිදි රොනාල්ඩෝ, අඛණ්ඩව ලෝක කුසලාන හයකදී ගෝල වාර්තා කළ පළමු ක්රීඩකයා ද වේ. 2030 වසරේදී පෘතුගාලය, ස්පාඤ්ඤය සහ මොරොක්කෝව එක්ව සත්කාරකත්වය සපයන ලෝක කුසලාන තරගාවලියට තමා සහභාගි නොවන බව ඔහු තහවුරු කළේය.
තරගයට පෙර අදහස් දක්වමින් රොනාල්ඩෝ පැවසුවේ “මෙය මගේ අවසන් ලෝක කුසලානයයි, නමුත් හෙට දිනය මගේ අවසන් තරගය නොවේවායි අපි ප්රාර්ථනා කරමු” යනුවෙනි.
මේ වන විට තරගාවලියේ ගෝල තුනක් වාර්තා කිරීමට සමත්ව සිටින රොනාල්ඩෝ, තමා වෘත්තීය පාපන්දු ජීවිතයෙන් විශ්රාම ගැනීම පිළිබඳව නිශ්චිතව පවසා නොමැති අතර, තවදුරටත් ක්රීඩා කරන්නේ තමා තුළ ඇති ආශාව සහ පාපන්දු කෙරෙහි පවතින දැඩි ඇල්ම නිසා බව අවධාරණය කළේය.
එමෙන්ම, එළඹෙන සඳුදා තරගයේ ප්රතිවාදී ක්රීඩකයෙකු වන ලැමින් යමාල් පිළිබඳව අදහස් දක්වමින් රොනාල්ඩෝ පැවසුවේ, ඔහු දීප්තිමත් අනාගතයක් ඇති ක්රීඩකයෙකු බවයි. දිගු කාලීන ක්රීඩා දිවියක් පවත්වා ගැනීම සඳහා විවේචනවලට යට නොවී, තමා කරන දේ කෙරෙහි පවතින ආශාව සහ රසිකයන්ගේ ආදරය කෙරෙහි අවධානය යොමු කිරීම වැදගත් බවත් ඔහු වැඩිදුරටත් කියා සිටියේය.
