ඇමසන් වෙබ් සර්විසස් (Amazon Web Services – AWS) සමාගම ශ්රී ලාංකික පාරිභෝගිකයන් වෙත දැනුම් දී ඇත්තේ, තම සමාගම වෙත වලංගු බදු ලියාපදිංචි අංකයක් (TRN) ඉදිරිපත් නොකරන, වැට් බදු ලියාපදිංචියක් නොමැති පාරිභෝගිකයන්ගේ AWS ක්ලවුඩ් සේවා සහ වෙළඳපල මිලදී ගැනීම් සඳහා 18%ක වැට් බද්දක් අය කිරීමට කටයුතු කරන බවයි.
මෙම නව බදු පැනවීම සම්බන්ධයෙන් අදාළ පාරිභෝගිකයන් වෙත දැනුම් දීමක් සිදුකර ඇති අතර, මෙම 18%ක බද්ද ක්රියාත්මක වන නිශ්චිත දිනය තවමත් සමාගම විසින් ප්රකාශයට පත් කර නොමැත. එසේ වුවද, තම ගිණුම් තොරතුරු යාවත්කාලීන කරන ලෙස AWS සමාගම පාරිභෝගිකයන්ගෙන් ඉල්ලා සිටී.
ශ්රී ලංකාවේ වැට් බදු ලියාපදිංචි කර ඇති ව්යාපාර තම බදු ලියාපදිංචි අංකය (TRN) AWS ගිණුමේ බදු සැකසුම් (Tax Settings) තුළ ඇතුළත් කළ යුතුය. එවිට අදාළ බදු නීතිවලට යටත්ව එම පාරිභෝගිකයන්ට මෙම බද්දෙන් නිදහස් වීමේ අවස්ථාව හිමිවේ. ශ්රී ලංකාවේ ලිපිනයක් සහිතව AWS ගිණුම් පවතින නමුත් සැබැවින්ම ශ්රී ලංකාවේ පදිංචි නොවන පාරිභෝගිකයන් තම බිල්පත් ලිපිනය සහ සම්බන්ධතා ලිපිනය AWS Billing Console හරහා වහාම යාවත්කාලීන කළ යුතුය. AWS සමාගම පාරිභෝගිකයන්ගෙන් ඉල්ලා සිටින්නේ 2026 ජූලි 31 දිනට පෙර මෙම කරුණු සම්බන්ධයෙන් අවශ්ය ක්රියාමාර්ග ගන්නා ලෙසයි.
මෙම නව බදු ප්රතිපත්තිය ශ්රී ලංකාවේ අගය එකතු කළ බදු (සංශෝධන) පනත, අංක 4 (2025) යටතේ හඳුන්වා දී ඇත. ඒ අනුව, විදේශීය සැපයුම්කරුවන් විසින් ඉලෙක්ට්රොනික වේදිකා හරහා සපයනු ලබන හරස් දේශසීමා ඩිජිටල් සේවා සඳහා 18%ක වැට් බද්දක් අය කෙරේ. මෙම බද්ද මුලින් 2025 ඔක්තෝබර් 01 දින සිට ක්රියාත්මක කිරීමට සැලසුම් කර තිබූ නමුත්, පසුව එය අවස්ථා කිහිපයකදී කල් දමන ලදී. දැනට පවතින තොරතුරු අනුව, දේශීය ඩිජිටල් සේවා සඳහා වන මෙම බද්ද ක්රියාත්මක කිරීමේ දිනයක් සම්බන්ධයෙන් අදාළ බලධාරීන්ගෙන් නිශ්චිත තහවුරු කිරීමක් බලාපොරොත්තුවෙන් පවතී.
මීට පෙර මයික්රොසොෆ්ට් (Microsoft) ආයතනයද සිය ඩිජිටල් සේවා සඳහා 18%ක වැට් බද්දක් අය කරන බව තම පාරිභෝගිකයන්ට දැනුම් දුන් අතර, ගූගල් (Google) වැනි අනෙකුත් ප්රධාන තාක්ෂණික සමාගම්ද ඉදිරියේදී මෙවැනිම ක්රියාමාර්ග ගනු ඇතැයි අපේක්ෂා කෙරේ.
