මහනුවර මහ නගර සභා සීමාවේ ඩෙංගු අධි අවදානම් තත්ත්වයේ පවතින කලාප 07ක් හඳුනා ගැනීමත් සමඟ, අවිධිමත් ලෙස කසළ බැහැර කරන පුද්ගලයන්ට එරෙහිව දැඩි නීතිමය ක්රියාමාර්ග ගැනීමට නගර සභාව ඒකමතිකව තීරණය කර තිබේ. පසුගිය සතිය තුළ පමණක් මහනුවර නාගරික සීමාවෙන් ඩෙංගු රෝගීන් 108 දෙනෙකු වාර්තා වී ඇති අතර, මහනුවර පොලීසිය අසල සිට පේරාදෙණිය පාර, බහිරවකන්ද, නිත්තවෙල, දේවී පාර සහ හීරැස්සගල යන ප්රදේශවලින් බහුතරයක් රෝගීන් වාර්තා වී ඇත. මේ වන විට මහනුවර ජාතික රෝහලේ රෝගීන් 110ක් සහ පේරාදෙණිය ශික්ෂණ රෝහලේ රෝගීන් 90 දෙනෙකු ප්රතිකාර ලබමින් සිටිති.
නියෝජ්ය පුරපති රුවන් ගලපිටිය මහතාගේ ප්රධානත්වයෙන් අද (06) පැවැති මාධ්ය හමුවකදී මහනුවර නාගරික ප්රධාන වෛද්ය නිලධාරී වෛද්ය ක්රිෂාන්ත මාසාච්චි මහතා පැවසුවේ, ජනතාව අවිධිමත් ලෙස පරිසරයට මුදාහැර තිබූ යෝගට් කෝප්ප සහ බීම බෝතල් හේතුවෙන් මදුරුවන් බෝවීම ශීඝ්ර වී ඇති බවයි. පසුගිය සති දෙකක කාලය තුළ රෝගීන්ගේ සැලකිය යුතු වැඩිවීමක් දක්නට ලැබෙන බවත්, ජලය එකතුවිය හැකි ප්ලාස්ටික් හා වීදුරු බෝතල් වැනි දේ අවිධිමත් ලෙස පරිසරයට මුදා හැරීම “මිනි මැරීමට තැත් කිරීමක්” ලෙස හැඳින්වීමේ වරදක් නොමැති බවත් හෙතෙම අවධාරණය කළේය.
