වත්මන් ආණ්ඩුව සිය මුළු ශ්රමයම යොදවා ඇත්තේ දේශපාලන පළිගැනීම් සඳහා පමණක් බවත්, එවැනි ක්රියාදාමයන් තුළින් ජනතාවගේ ආර්ථිකය ශක්තිමත් කිරීමට හෝ රටක් ලෙස ඉදිරියට යාමට නොහැකි බවත් සර්වජන බලයේ නායක පාර්ලිමේන්තු මන්ත්රී දිලිත් ජයවීර මහතා පවසයි.
මීගමුව බන්ධනාගාරයේ ඇති වූ ගැටුම සහ ඉන් සිදුවූ ජීවිත හානි සම්බන්ධයෙන් අද (07) පාර්ලිමේන්තුවේ පැවති විවාදයේදී අදහස් දක්වමින් මන්ත්රීවරයා මේ බව සඳහන් කළේය. ඔහු දැක්වූ ප්රධාන අදහස් පහත දැක්වේ.මීගමුව බන්ධනාගාර සිද්ධිය රටේ සමාජ යථාර්ථය සහ අරාජිකත්වයේ ඇරඹුමක තවත් ලකුණක් බව පෙන්වා දුන් මන්ත්රීවරයා, පටු දේශපාලන අරමුණු වෙනුවෙන් මඩ ගැසීම් සිදු නොකර, මෙම ගැටලුවට අවංකව විසඳුම් සෙවීමට පාර්ලිමේන්තුව උත්සාහ කළ යුතු බව අවධාරණය කළේය.පසුගිය වසර එකහමාරක කාලය තුළ පාසල් දරුවන් අතර මත්ද්රව්ය භාවිතය විශාල වශයෙන් වර්ධනය වී ඇති බව පොළොන්නරුවේ ගුරුවරියක පවා සංවේගයෙන් ප්රකාශ කළ බවත්, සමාජය කඩා වැටෙන විට මෙවැනි තත්ත්වයන් වළක්වාගත නොහැකි බවත් ඔහු පෙන්වා දුන්නේය.රටක් ලෙස සංවර්ධනයක් හෝ අලුත් කර්මාන්තශාලාවක් බිහි නොවන, ආර්ථික ව්යාප්තියක් නොමැති තත්ත්වයක රුපියල ශක්තිමත් කරගැනීමට පවා අප අසමත්ව සිටින බව ඔහු පැවසීය. සංඛ්යා ලේඛන පෙන්වමින් ආර්ථිකය ඉදිරියට යන බව පැවසුවද, යථාර්ථයේදී රට ඉතා වේගයෙන් පරිහානියට ගමන් කරමින් තිබේ.දේශපාලන සංස්කෘතිය වෙනස් කිරීමේ අවශ්යතාව: ආණ්ඩුව සහ සමස්ත දේශපාලන පක්ෂ පටු දේශපාලන පළිගැනීම් සහ තමන්ගේ පැවැත්ම උදෙසා පමණක් ක්රියා කරන උපකරණ භාවිතයෙන් එළියට පැමිණිය යුතු බව ඔහු අවධාරණය කළේය.අවසාන වශයෙන්, අපේ මව්බිම ගොඩනැගීමට සහ රටේ තරුණ පරපුරට බලාපොරොත්තුවක් ඇති කිරීමට අවශ්ය ධනාත්මක සංවාදයක් සමාජය තුළ ඇති කරන ලෙසත්, පටු දේශපාලන වුවමනාවන් වෙනුවට රටේ අනාගතය වෙනුවෙන් කටයුතු කරන ලෙසත් ඔහු සියලුම දේශපාලනඥයින්ගෙන් ආයාචනාත්මකව ඉල්ලා සිටියේය.
