ශ්රී ලංකාවේ සෞඛ්ය සේවාව ජාත්යන්තර මට්ටමේ ගුණාත්මක තලයකට ඔසවා තැබීම රජයේ අරමුණ බවත්, ඒ සඳහා අවශ්ය ප්රතිපාදන ලබාදීමට රජය සූදානම් බවත් ජනාධිපති අනුර කුමාර දිසානායක මහතා අවධාරණය කළේය. සෞඛ්ය සහ ජනමාධ්ය අමාත්යාංශවල 2026 අයවැය ප්රතිපාදන යටතේ ක්රියාත්මක ව්යාපෘතිවල ප්රගතිය සහ 2027 අයවැය යෝජනා පිළිබඳව ජනාධිපති ලේකම් කාර්යාලයේ පැවති පෙර සාකච්ඡාවකදී ජනාධිපතිවරයා මේ බව සඳහන් කළේය.
මෙම සාකච්ඡාවේදී අනාවරණය වූ වැදගත් කරුණු කිහිපයක් පහත දැක්වේ:
පසුගිය රජයන් විසින් ප්රාග්ධන වියදම් නතර කිරීම හේතුවෙන් අතරමග නතර වී තිබූ මහා පරිමාණ ඉදිකිරීම් ව්යාපෘති 26ක් වත්මන් රජය විසින් යළි ආරම්භ කර ඇත. ඒ අනුව දැනට සෞඛ්ය ක්ෂේත්රයේ සමස්ත ව්යාපෘති 48ක කටයුතු ක්රියාත්මක වෙමින් පවතී. මීට සමගාමීව, පොළොන්නරුව දිස්ත්රික් රෝහලේ නව ගොඩනැගිලි සංකීර්ණය සහ ත්රිකුණාමලය, අම්පාර, හලාවත රෝහල්වල හදිසි අනතුරු හා ප්රතිකාර ඒකක වැනි ව්යාපෘති ද යළි ආරම්භ කර ඇත.
ප්රාථමික සෞඛ්ය සේවාව ශක්තිමත් කිරීම සඳහා “ආරෝග්යා සුව සේවා මධ්යස්ථාන” ගොඩනැගීමේ වැඩපිළිවෙළ කෙරෙහි විශේෂ අවධානය යොමු විය. රෝහල් පද්ධතිය තුළ නව තාක්ෂණික පරිවර්තනයක් සිදු කිරීමේ අවශ්යතාවය පැහැදිලි කළ ජනාධිපතිවරයා, එමගින් ජනතාවට කාර්යක්ෂම සහ ප්රමිතියෙන් යුත් සේවාවක් ලබා දීමත්, පෞද්ගලික අංශයෙන් සේවා ලබා ගැනීමේදී ජනතාවට දැරීමට සිදුවන අධික වියදම් බර අවම කිරීමත් අපේක්ෂා කරන බව පෙන්වා දුන්නේය.
ගිලන් රථ ලබා ගැනීමේදී සාම්ප්රදායික වෑන් රථ වෙනුවට ජාත්යන්තර ප්රමිතීන්ට අනුකූල, ඉහළ තාක්ෂණික උපකරණ සහිත ගිලන් රථ පමණක් යොදා ගැනීම පිළිබඳව ද මෙහිදී සාකච්ඡා කෙරිණි. සෞඛ්ය සේවාවේ ගුණාත්මකභාවය ඉහළ නැංවීම සඳහා විද්යාත්මක පදනමක් සහිත උපායමාර්ගික යෝජනා කඩිනමින් ඉදිරිපත් කරන ලෙස ජනාධිපතිවරයා නිලධාරීන්ට උපදෙස් ලබා දුන්නේය.
