මහාවිහාරවංශික ශ්යාමෝපාලි මහානිකායේ මල්වතු මහාවිහාර පාර්ශ්වයේ 2026 වර්ෂයේ උපසම්පදාව ලැබූ නවක භික්ෂූන් වහන්සේලා වෙනුවෙන් සංවිධානය කරනු ලබන විශේෂ පුහුණු වැඩමුළුව එළඹෙන ජූලි 14 වැනි අඟහරුවාදා හොරණ ගෝනපොළ ඓතිහාසික ඔලබොඩුව රාජමහා විහාරස්ථානයේදී පැවැත්වීමට කටයුතු සූදානම් කර තිබේ. මල්වතු මහාවිහාරීය තිබ්බටුවාවේ ශ්රී සිද්ධාර්ථ සුමංගල මහනාහිමියන් ප්රමුඛ කාරක මහා සංඝසභාවේ අනුමැතිය පරිදි, මල්වතු පාර්ශ්වීය බස්නාහිර පළාත් මහා සංඝ සභාවේ සංවිධායකත්වයෙන් සහ සබරගමු පළාත් මෙන්ම මාතර දිස්ත්රික් මහා සංඝ සභාවන්හි සම්බන්ධීකාරකත්වයෙන් මෙම වැඩමුළුව දවස පුරා පැවැත්වේ.
එදින අලුයම 6.30 සිට සවස 6.30 දක්වා පැවැත්වෙන මෙම පුහුණුවේදී භික්ෂු විනය, ආචාර ධර්ම, ආරාම කළමනාකරණය, ගිහිපැවිදි සබඳතා සහ උපෝසථකර්ම ආදී තේමා රැසක් යටතේ මහාචාර්ය අගලකඩ සිරිසුමන නාහිමි, මහාචාර්ය මාවතගම පේමානන්ද හිමි, මහාචාර්ය මැදගොඩ අභයතිස්ස හිමි ඇතුළු සම්පත් දායකයන් පිරිසක් දේශන පවත්වනු ලබයි. අමාවක පොහොය යෙදෙන එදින සන්ධ්යාවේ සහතිකපත්ර ප්රදානෝත්සවය ආචාර්ය පන්නිල ආනන්ද නාහිමියන්ගේ ප්රධානත්වයෙන් පැවැත්වෙන අතර, සහභාගි වන සියලුම නවක හිමිවරුන් මල්වතු සම්ප්රදායට අනුකූලව වැඩම කළ යුතු බව ඔලබොඩුව රාජමහා විහාරස්ථානයේ විහාරාධිපති, මහා ලේඛකාධිකාරි ඔලබොඩුවේ ධම්මික නාහිමියන් දන්වා සිටිති.
