ප්රබල සුපිරි සුළි කුණාටුවක් වන ‘බාවි’ ජපානයේ නිරිතදිග දූපත් ආසන්නයට ළඟා වෙමින් පවතින බැවින්, දරුණු සුළං, ධාරානිපාත වැසි, නායයෑම් සහ ගංවතුර තත්ත්වයන් පිළිබඳව බලධාරීන් විසින් දැඩි අනතුරු ඇඟවීම් නිකුත් කර තිබේ.
මෙම සුළි කුණාටුව සම්බන්ධයෙන් දැනට පවතින තත්ත්වය පහත පරිදි වේ:
ජපානයේ සකිෂිමා දූපත් ආසන්නයට ළඟා වෙමින් පවතින මෙම සුළි කුණාටුව පැයට කිලෝමීටර් 162ක පමණ උපරිම සුළං වේගයක් පවතින බව වාර්තා වේ. සෙනසුරාදා වන විට මෙය තවදුරටත් වර්ධනය වී සුළං වේගය පැයට කිලෝමීටර් 252ක් දක්වා ඉහළ යා හැකි බව ජපාන කාලගුණ විද්යා ඒජන්සිය අනතුරු අඟවයි. මෙය වසර ගණනාවකට පසු කලාපයට බලපාන විනාශකාරීම කුණාටුව විය හැකි බව පර්යේෂකයෝ පවසති.
පවතින අයහපත් කාලගුණික තත්ත්වය හේතුවෙන් ගුවන් සමාගම් විසින් පියාසැරි දුසිම් ගණනක් අවලංගු කර ඇත. ජපානයේ ඉෂිගාකි දූපතේ සංචාරකයන් මෙන්ම පදිංචිකරුවන් ද අත්යවශ්ය ද්රව්ය රැස් කරගනිමින් නිවාස සහ වෙළෙඳසැල් සුරක්ෂිත කිරීමට කටයුතු කරමින් සිටී. ඇතැම් වෙරළ තීරයන් සහ පොදු උද්යාන ආරක්ෂක හේතූන් මත වසා දමා ඇත.
තායිවානය ද මෙම කුණාටුවට මුහුණ දීම සඳහා දැඩි සූදානමක පසුවේ. එරට උතුරු සහ නැගෙනහිර ප්රදේශවල රජයේ ආයතන වසා දමා ඇති අතර, මූල්ය වෙළෙඳපොළ ද අත්හිටුවා ඇත. ගංවතුරින් ආරක්ෂා වීම සඳහා වැලි මලු බෙදා දීමට විශේෂ මධ්යස්ථාන පිහිටුවා තිබේ. සුළි කුණාටුව උතුරු තායිවානය පසුකරමින් ජූලි 11 වන දින චීනයේ ෆුජියන් පළාතට ගොඩබෑමට නියමිත බව කාලගුණ නිලධාරීන් පවසයි.
විද්යාඥයන් පවසන පරිදි මෙම සුළි කුණාටුවේ ප්රමාණය මීටර් 1,000ක පමණ විෂ්කම්භයක් සහිත වන අතර, එය ප්රංශයේ පළලට සමාන වේ. දේශගුණික විපර්යාස සහ මෙම වසරේ පවතින එල් නිනෝ තත්ත්වය හේතුවෙන් සුළි කුණාටුවල තීව්රතාවය ඉහළ ගොස් ඇති බව විශේෂඥයන් පෙන්වා දෙයි.
