අක්මීමන ප්රදේශයේදී අමානුෂික ලෙස සුනඛයෙකු ඝාතනය කිරීම සහ දේපළ හානි කිරීමේ සිද්ධියකට අදාළව අධිකරණය හමුවේ ගොනු කර ඇති නඩු කටයුත්තේදී, අක්මීමන පොලිසිය විසින් සිදුකර ඇති විමර්ශනවල ඇති බරපතළ අඩුපාඩු පිළිබඳව අගතියට පත් පාර්ශ්වය විසින් දැඩි විවේචනයක් එල්ල කරනු ලැබේ. 2024 දෙසැම්බර් 18 දින සිදුවූ මෙම අපරාධයට සම්බන්ධ සැකකරුවන්ට වාසිදායක වන ලෙස පොලිසිය කටයුතු කර ඇති බව ඔවුන් පෙන්වා දෙයි.
සිද්ධියට අදාළ නීතිමය වගන්ති සහ අණපනත් නිසි පරිදි චෝදනා පත්රයට ඇතුළත් කිරීමට පොලිසිය අපොහොසත් වී තිබේ. සිද්ධියට අදාළව අපරාධයට සහයෝගය දැක්වූ ත්රීරෝද රථයේ සිටි මව සහ වෙනත් පාර්ශ්වයන් නඩුවේ චූදිතයන් ලෙස නම් කිරීමට පොලිසිය කටයුතු කර නොමැත. මියගිය සතා සම්බන්ධයෙන් පශ්චාත් මරණ පරීක්ෂණ වාර්තා ලබා නොගැනීම සහ සැකකරුවන්ගේ මත්ද්රව්ය පරීක්ෂණ වාර්තා මගහැර තිබියදී, චූදිතයන්ට වාසිදායක වන දර්ශන පිටපත් කර ගැනීමට පොලිසිය දැඩි උනන්දුවක් දැක්වීම සැක සහිත බව අගතියට පත් පාර්ශ්වය පවසයි.
අධිකරණයේදී සැකකරුවන්ගේ නීතිඥවරයා විසින් මෙම අපරාධය සිදු නොවූ බවට ප්රකාශ කර තිබුණ ද, ඒ සඳහා පවතින වීඩියෝ සාක්ෂි පොලිසිය විසින් අධිකරණයට නිසි ලෙස ගොනු කර ඇති බව පෙනෙන්නට නැත. මෙම නඩුව ලබන ඔක්තෝබර් 14 දින දක්වා කල් දමා ඇති අතර, අගතියට පත් පාර්ශ්වය වෙනුවෙන් නීතිඥ මදනායක මහතා පෙනී සිටියේය.
පොලිසිය විසින් හිතාමතා හෝ අතපසුවීමෙන් සිදුකර ඇති මෙම අක්රමිකතා සම්බන්ධයෙන් පොලිස්පතිවරයාගේ සහ නීතිපතිවරයාගේ අවධානය වහාම යොමු කිරීමටත්, චෝදනා පත්රය සංශෝධනය කර ගැනීමටත් අගතියට පත් පාර්ශ්වය බලාපොරොත්තු වේ.
