ගම්පොළ නගරයේ පිහිටි ප්‍රමුඛ බෞද්ධ විද්‍යාලයක ඩෙංගු මර්දන ශ්‍රමදානයක් අතරතුරදී වසර විස්සකට වඩා පැරැණි බවට සැකකෙරෙන විශාල රහසිගත භූගත කාමරයක් අහඹු ලෙස අනාවරණය වී තිබේ.
පාසල් වත්ත පිරිසිදු කිරීමේ කටයුතුවලදී, ආපනශාලාවේ අපජලය බැහැර කිරීමට වළක් කැපීමේදී සිමෙන්ති කොන්ක්‍රීට් තට්ටුවක් හමුවී ඇති අතර, එය පැරණි අපවහන පද්ධතියක් ලෙස සිතා එම කොන්ක්‍රීට් ස්ථරය විද අපජල නළය ඇතුළට යොමු කර ඇත. ඉන් අනතුරුව, පාසල් භූමියට යාබද නිවසක කාන්තාවක පැමිණ ප්‍රකාශ කර ඇත්තේ, පාසල් භූමියේ සිට පහළට දමා ඇති බටයකින් තම නිවසේ කාමරයකට අපජලය ගලා එන බවයි.
පසුව කරන ලද පරීක්ෂණවලදී අනාවරණය වී ඇත්තේ, අදාළ නිවසේ හිමිකරුවන් විසින් පාසල් භූමියට යටින් අඩි 40ක් පමණ වන ගොඩනැගිලි කොටසක් ඉදිකර ඇති බවයි. ඔවුන් එය තම ගරාජය සහ බඩු ගබඩා කාමරය ලෙස භාවිත කළ බව ප්‍රකාශ කළ ද, මෙම රහසිගත ඉදිකිරීම සහරාන් හෂීම්ගේ කණ්ඩායම හා සම්බන්ධ එකක් දැයි සැකයක් පවතින බව වාර්තා වේ.
සිද්ධිය සම්බන්ධයෙන් විදුහල්පතිවරයා විසින් කලාප අධ්‍යාපන කාර්යාලයට සහ ගම්පොළ පොලිසියට නිල වශයෙන් පැමිණිලි කර ඇත.
