පාරිසරික අංශයට අයත් ආයතනවල ඵලදායීතාව සහ රාජ්ය සේවා සැපයීම ශක්තිමත් කිරීමේ අරමුණින්, එම ආයතනවල පවතින පුරප්පාඩු කඩිනමින් පිරවීමට පියවර ගන්නා බව පරිසර අමාත්යාංශය පවසයි. පරිසර අමාත්ය ආචාර්ය දම්මික පටබැඳි මහතාගේ ප්රධානත්වයෙන් අමාත්යාංශ ශ්රවණාගාරයේ පැවැති මාධ්ය හමුවකදී මේ බව නිවේදනය කෙරිණි.
මෙහිදී නව බඳවා ගැනීමේ ක්රියාවලිය, මූල්ය ප්රතිපාදන වෙන් කිරීම, බලතල පැවරීම සහ දිස්ත්රික් මෙන්ම ප්රාදේශීය ලේකම් කාර්යාලවලට අනුයුක්ත පාරිසරික සංවර්ධන නිලධාරීන්ගේ වගකීම් පිළිබඳව නිලධාරීන් විසින් පැහැදිලි කරනු ලැබීය. අමාත්යාංශය යටතේ පාලනය වන ප්රධාන ආයතන 10ක් සඳහා මෙම බඳවා ගැනීම් සිදුකෙරේ. ඒ අතර මධ්යම පරිසර අධිකාරිය, වනජීවී සංරක්ෂණ දෙපාර්තමේන්තුව, වන සංරක්ෂණ දෙපාර්තමේන්තුව, රාජ්ය දැව සංස්ථාව, ජාතික සත්වෝද්යාන දෙපාර්තමේන්තුව, ජාතික උද්යාන දෙපාර්තමේන්තුව, ජල සම්පත් මණ්ඩලය, වෙරළ සංරක්ෂණ හා වෙරළ සම්පත් කළමනාකරණ දෙපාර්තමේන්තුව, සමුද්රීය පරිසර ආරක්ෂණ අධිකාරිය සහ ශ්රී ලංකා දේශගුණික අරමුදල යන ආයතන ඇතුළත් වේ.
මෙම බඳවා ගැනීමේ වැඩපිළිවෙළ රජයේ “සමෘද්ධිමත් රට – සුන්දර ජීවිතයක්” ප්රතිපත්ති රාමුව යටතේ ක්රියාත්මක “තිරසාර ජෛවගෝලයක් – සදාහරිත ජීවිතයක්” යන පරිසර වැඩසටහනේ කොටසකි. පවතින ආර්ථික අභියෝග මධ්යයේ වුවද, අත්යවශ්ය පුරප්පාඩු පිරවීම සඳහා කැබිනට් අනුමැතිය ලබාගෙන ඇති බවත්, සුදුසුකම් ලත් පුද්ගලයින් රාජ්ය සේවයට බඳවා ගැනීම හරහා පරිසර ආයතනවල කාර්යක්ෂමතාව ඉහළ නැංවීමට බලාපොරොත්තු වන බවත් අමාත්යාංශය වැඩිදුරටත් සඳහන් කරයි.
