වත්මන් රජය වතුකරයේ ජනතාවගේ ඡන්දය ලබා ගැනීම සඳහා පොරොන්දු රැසක් ලබා දුන්නද, බලයට පත්ව වසර දෙකක් ගතවී තිබියදී එම පොරොන්දු අතරින් ඉටු කර ඇත්තේ වතු කම්කරුවන්ගේ වැටුප් වැඩි කිරීම පමණක් බව දමිළ ප්රගතිශීලී සංධානයේ නියෝජ්ය නායක සහ පාර්ලිමේන්තු මන්ත්රී පලනි දිගම්බරම් මහතා චෝදනා කර තිබේ.
මෙම සිදුවීමට අදාළව, හැටන් නගරයේ පැවති රැස්වීමකදී ඔහු සඳහන් කර ඇත්තේ රජය බලයට පත්වූ මුල් වසර දෙක තුළ විපක්ෂය ඉවසීමෙන් කටයුතු කළද, ජනතාවට ලබාදුන් පොරොන්දු ඉටු නොවීම හේතුවෙන් දැන් ඒ පිළිබඳව හඬ නැගීමට සිදුව ඇති බවයි. දමිළ සහ මුස්ලිම් දේශපාලන පක්ෂ එක්ව රජයෙන් පොරොන්දු ඉටු කර ගැනීම සඳහා සන්ධානයක් ගොඩනඟා ඇති බවත්, ජනාධිපතිවරයා හමුවූ අවස්ථාවලදී වතුකරයේ ජනතාවට පොරොන්දු වූ ඉඩම් ලබාදෙන ලෙස ඉල්ලා සිටි බවත් ඔහු ප්රකාශ කර තිබේ.
ජාතික ජන බලවේගය බලයට පත් කිරීමට සහය දැක්වූ ජනතාවගෙන් පිරිසක් වත්මන් රජයේ ක්රියාකලාපය හේතුවෙන් මේ වන විට එම පක්ෂයෙන් ඈත් වෙමින් සිටින බවටද දිගම්බරම් මහතා වැඩිදුරටත් පවසා ඇත.
