ළමා පරපුරේ ආරක්ෂාව තහවුරු කිරීම සහ නිරෝගී සමාජයක් බිහි කිරීම වෙනුවෙන් ඒ ඒ වයස් කාණ්ඩයට ගැළපෙන පරිදි විද්යාත්මක ලිංගිකත්ව අධ්යාපනයක් (Sex Education) ලබා දීම අනිවාර්ය කරුණක් බව සෞඛ්ය අමාත්ය වෛද්ය නලින්ද ජයතිස්ස මහතා ප්රකාශ කළේය. විශේෂ වැඩසටහනක් අමතමින් අමාත්යවරයා පෙන්වා දුන්නේ, වර්තමානයේ වාර්තා වන බොහෝමයක් ළමා අපයෝජන සිදුවීම්වල ඇති ඛේදනීය සත්යය වන්නේ තමන්ට සිදු වූයේ කුමක්දැයි වින්දිත දරුවන් පවා නිසි ලෙස දැනුවත්ව නොසිටීම බවයි. දරුවන් තුළ පවතින මෙම නොදැනුවත්භාවය සඳහා වගකිව යුත්තේ ඔවුන් නොව, සමාජයේ මුහුකුරා ගිය දැනුමක්, අවබෝධයක් සහ පරිණතභාවයක් සහිත වැඩිහිටි ප්රජාව බව ද අමාත්යවරයා එහිදී ඍජුවම ප්රකාශ කළේය.
සෞඛ්ය අමාත්යාංශයේ නිල දත්ත උපුටා දක්වමින් අමාත්යවරයා අනාවරණය කළේ, 2025 වසර තුළදී පමණක් මෙරටින් ළමා අපයෝජන සම්බන්ධ පැමිණිලි 10,455 ක් ලැබී ඇති බවයි. එමෙන්ම, එම වසරේදී නව HIV ආසාදිතයන් 874 දෙනෙකු වාර්තා වී ඇති අතර ඉන් 107 දෙනෙකුම වයස අවුරුදු 15 ත් 24 ත් අතර පසුවන තරුණ ප්රජාව වීම විශේෂත්වයකි. මෙම සෑම සංඛ්යා ලේඛනයක් පිටුපසම විනාශ වී යන්නේ රටේ වටිනා ජීවිත සහ අනාගතය බව පෙන්වා දුන් සෞඛ්ය අමාත්යවරයා, දරුවන් ආරක්ෂා කර ගැනීම සඳහා විධිමත් දැනුම් පද්ධතියක් සහ විෂය මාලාවක් සකස් කිරීමට රජය පියවර ගනිමින් සිටින බව සඳහන් කළේය. මෙම ප්රගතිශීලී ක්රියාවලියට යම් කණ්ඩායමක් හෝ පාර්ශ්වයක් බාධා එල්ල කරන්නේ නම්, රට තුළ සිදුවන ළමා අපයෝජන සහ ලිංගික සම්ප්රේෂණ රෝග පැතිරීමේ වගකීම එම අන්ධ භක්තික කණ්ඩායම් විසින් භාරගත යුතු බව ද ඔහු වැඩිදුරටත් කියා සිටියේය.
නූතන සමාජයක මහජන සෞඛ්යය, ළමා සුභසාධනය සහ මානව හිමිකම් සුරක්ෂිත කිරීමේදී, විද්යාත්මක මඟපෙන්වීම් සහ ලිංගික සෞඛ්ය අධ්යාපනය පාසල් පද්ධතියට ඇතුළත් කිරීම අතිශය තීරණාත්මක සාධකයක් වන බව සෞඛ්ය, අධ්යාපන හා සමාජයීය විශ්ලේෂකයෝ පෙන්වා දෙති. පටු ආකල්ප සහ මිථ්යා මත පසෙකලා, දරුවන් අපයෝජනයෙන් මුදවා ගැනීමට සහ තරුණ පරපුර බෝ නොවන හා බෝවන රෝගවලින් ආරක්ෂා කර ගැනීමට මෙවැනි රාජ්ය ප්රතිපත්තිමය තීරණ ක්රියාවට නැංවීම, ප්රගතිශීලී සමාජ පරිවර්තනයකට මනා පිටිවහලක් වන බව සෞඛ්ය අංශ සන්කල්පනය කරයි. රජය ගන්නා මෙම කාලීන පියවර මෙරට සමාජ ආරක්ෂණ ක්ෂේත්රයේ සාධනීය හැරවුම් ලක්ෂ්යයක් වනු ඇතැයි ද අපේක්ෂා කෙරේ.
