බලහත්කාරී ශ්රමය යොදා නිෂ්පාදනය කරන ලද භාණ්ඩ මෙරටට ආනයනය කිරීම තහනම් කරමින් නිකුත් කර ඇති නව ගැසට් නිවේදනය ක්රියාත්මක කිරීම සඳහා ජාත්යන්තර ප්රමිතීන්ට අනුකූල පැහැදිලි රාමුවක් සකස් කරන ලෙස ශ්රී ලංකා අපනයනකරුවන්ගේ සංගමය (EASL) රජයෙන් ඉල්ලා සිටී.
අපනයනකරුවන්ගේ සංගමය පවසන්නේ ජාත්යන්තර ශ්රම ප්රමිතීන් ආරක්ෂා කිරීමට සහ සැපයුම් දාමවලින් බලහත්කාරී ශ්රමය තුරන් කිරීමට රජය ගෙන ඇති පියවර අගය කරන බවයි. කෙසේ වෙතත්, නියාමන ගැසට් කර තිබුණද, ඒවා ක්රියාත්මක කිරීම සඳහා අවශ්ය මෙහෙයුම් මාර්ගෝපදේශ තවමත් අවසන් කර නොමැති වීම ගැටලුවක් බව ඔවුන් පෙන්වා දෙයි.
නිශ්චිත රාමුවක් නොමැති වීම හේතුවෙන් ව්යාපාරික කටයුතුවල අවිනිශ්චිතතාවයක් ඇති විය හැකි බවත්, අනුකූලතා පිරිවැය ඉහළ යාම, භාණ්ඩ නැව්ගත කිරීමේ ප්රමාදයන් සහ නීත්යානුකූල වෙළඳ කටයුතුවලට බාධා ඇති විය හැකි බවත් සංගමය අනතුරු අඟවයි.
මෙහෙයුම් ක්රියාපටිපාටි හඳුන්වා දීමට පෙර අපනයනකරුවන්, ආනයනකරුවන්, වාණිජ මණ්ඩල සහ සැපයුම් සේවා සපයන්නන් ඇතුළු පාර්ශ්වකරුවන් සමඟ ව්යුහගත සාකච්ඡාවල නිරත වන ලෙස ඔවුන් රජයෙන් ඉල්ලා සිටී.
සෑම ආනයන ගනුදෙනුවක් සඳහාම අනිවාර්යයෙන්ම ලේඛන ඉල්ලා සිටිනවා වෙනුවට, ජාත්යන්තර හොඳම භාවිතයන්ට අනුකූලව වැඩි අවදානමක් සහිත භාණ්ඩ සහ සැපයුම් දාම ඉලක්ක කරගත් අවදානම් පදනම් කරගත් බලාත්මක කිරීමේ ආකෘතියක් අනුගමනය කරන ලෙස සංගමය නිර්දේශ කරයි.
ශ්රී ලංකා රේගුව විසින් නියාමනය බලාත්මක කිරීමට පෙර, ලේඛන අවශ්යතා, සත්යාපන ක්රියා පටිපාටි සහ සාධාරණ සංක්රාන්ති විධිවිධාන ආවරණය වන පරිදි පුළුල් මාර්ගෝපදේශ ප්රකාශයට පත් කරන ලෙස ද ඔවුන් ඉල්ලා සිටී.
ශ්රී ලංකාවේ අපනයනකරුවන් සදාචාරාත්මක වෙළඳාමට සහාය ලබා දෙන බවත්, නීත්යානුකූල වෙළඳාමට අහිතකර ලෙස බලපෑම් ඇති නොවන පරිදි පැහැදිලි මාර්ගෝපදේශ සහ පාර්ශ්වකරුවන්ගේ උපදෙස් මත නව අනුකූලතා ක්රමවේද සකස් කළ යුතු බවත් එම සංගමයේ සභාපති නාලක රත්නායක මහතා අවධාරණය කරයි.
