ලබන සැප්තැම්බර් මාසයේදී එක්සත් ජාතීන්ගේ මහා මණ්ඩල සැසියට සහභාගී වීම සඳහා නිව්යෝර්ක් නුවරට පැමිණීමට නියමිත ඊශ්රායෙල් අග්රාමාත්ය බෙන්ජමින් නෙතන්යාහු අත්අඩංගුවට ගැනීමට ඇති නීතිමය හැකියාව පිළිබඳව නිව්යෝර්ක් නගරාධිපති සොහ්රාන් මම්දානි ගවේෂණය කරමින් සිටියි.
ගාසා තීරයේ සිදුකළ යුද අපරාධ සහ මනුෂ්යත්වයට එරෙහි අපරාධ සම්බන්ධයෙන් ජාත්යන්තර අපරාධ අධිකරණය විසින් 2024 නොවැම්බර් මාසයේදී නෙතන්යාහුට එරෙහිව අත්අඩංගුවට ගැනීමේ වරෙන්තුවක් නිකුත් කර තිබුණි. යුද්ධයේදී කුසගින්න ආයුධයක් ලෙස භාවිතා කිරීම ඇතුළු අමානුෂික ක්රියා සම්බන්ධයෙන් ඔහුට චෝදනා එල්ල වී ඇති අතර, නෙතන්යාහු අයිති වන්නේ හේග් නුවරට බව නගරාධිපති මම්දානි අවධාරණය කරයි.
එක්සත් ජාතීන්ගේ සංවිධානයේ ඊශ්රායෙල් තානාපති ඩැනී ඩැනොන් ප්රකාශ කළේ නගරාධිපතිවරයා යුදෙව් විරෝධී රැල්ලක් නිර්මාණය කිරීමට උත්සාහ කරන බවයි. කෙසේ වෙතත්, මෙම තර්ජන පිළිබඳව තමන් සැලකිලිමත් නොවන බව අග්රාමාත්ය නෙතන්යාහු ප්රකාශ කර ඇත.
නීතිමය වශයෙන් එක්සත් ජනපදය හෝ ඊශ්රායෙලය ජාත්යන්තර අපරාධ අධිකරණයේ සාමාජිකයන් නොවන අතර, එවැනි ඉල්ලීම්වලට සහය දැක්වීම ඇමරිකානු ෆෙඩරල් නීතිය මගින් ප්රාදේශීය බලධාරීන්ට තහනම් කර ඇත. නිව්යෝර්ක් ආණ්ඩුකාර කැතී හෝචුල් ද මීට පෙර සඳහන් කර තිබුණේ අග්රාමාත්යවරයෙකු අත්අඩංගුවට ගැනීමට නගරාධිපතිවරයාට නීතිමය බලයක් නොමැති බවයි. එහෙත්, නීතියෙන් ඉඩ ලබාදෙන ඕනෑම පියවරක් ගැනීමට තමන් සූදානම් බව නගරාධිපතිවරයා පවසයි.
