2026 අංක 11 දරන දේශීය ආදායම් (සංශෝධන) පනත පසුගිය ජූලි 03 වන දින සිට බලාත්මක කරමින්, නියමිත ආදායම් බදු අනුකූලතා අවශ්යතා ඉටු කිරීමට අපොහොසත් වන බදු ගෙවන්නන්ට එරෙහිව අපරාධමය නඩු පැවරීමේ විධිවිධාන දේශීය ආදායම් දෙපාර්තමේන්තුව විසින් හඳුන්වා දී තිබේ. 2017 අංක 24 දරන දේශීය ආදායම් පනත සංශෝධනය කරමින් ගෙන එන ලද මෙම නව නීති රාමුව හරහා බදු අනුකූලතාව දැඩි ලෙස බලාත්මක කිරීමට අපේක්ෂා කෙරේ.
මේ යටතේ ආදායම් බදු කාර්යයන් සඳහා ලියාපදිංචි නොවී සිටීම, ආදායම් බදු වාර්තා ගොනු නොකිරීම සහ රඳවා ගැනීමේ බදු මෙන්ම පුද්ගල ආදායම් බදු වාර්ෂික ප්රකාශ ඉදිරිපත් නොකිරීම වැනි ව්යවස්ථාපිත අවශ්යතා සපුරාලීමට අපොහොසත් වන ඕනෑම තැනැත්තෙකුට එරෙහිව නඩු පැවරීමේ ක්රියාමාර්ග ආරම්භ කළ හැකි බව දෙපාර්තමේන්තුව නිවේදනය කරයි. මෙම ක්රියාවලිය මගින් බදු ගෙවන්නන්ගේ වගකීම් සහ අනුකූලතාව ඉහළ නැංවීම මූලික අරමුණ වී ඇත.
දේශීය ආදායම් දෙපාර්තමේන්තුව විසින් අවධාරණය කරන්නේ පනත මගින් නියම කර ඇති නීතිමය විධිවිධාන අනුගමනය කිරීම සෑම බදු ගෙවන්නෙකුගේම වගකීමක් වන බවයි. එබැවින් නීතිමය ක්රියාමාර්ගවලට මුහුණ දීම වැළැක්වීම සඳහා නියමිත කාලසීමාවන් තුළ සිය බදු වාර්තා සහ අදාළ ප්රකාශ ඉදිරිපත් කරන ලෙස බලධාරීහු උපදෙස් ලබා දෙති. රටේ බදු පද්ධතියේ විනිවිදභාවය සහ කාර්යක්ෂමතාව තහවුරු කිරීම උදෙසා මෙවැනි නීතිමය සංශෝධන ක්රියාත්මක කිරීම අත්යවශ්ය පියවරක් ලෙස සැලකේ.
