රජයක් වශයෙන් නවෝත්පාදන පර්යේෂණ සඳහා අවශ්ය යටිතල පහසුකම්, මූල්යමය සහයෝගය මෙන්ම ආයතන අතර සම්බන්ධතාව ගොඩනැගීමේ වගකීම උපරිමයෙන් ඉටු කරන බව අග්රාමාත්ය ආචාර්ය හරිනි අමරසූරිය සඳහන් කළාය. පාර්ලිමේන්තු මන්ත්රී වෛද්ය ජනක සේනාරත්න මහතා යොමු කළ ප්රශ්න කිහිපයකට පිළිතුරු ලබා දෙමින් අග්රාමාත්යතුමිය මේ බව පාර්ලිමේන්තුවේදී පැවසීය. නව ව්යවසායකත්වය හා තාක්ෂණය වාණිජකරණය ප්රවර්ධනය කිරීම සඳහා විශ්වවිද්යාල සහ රාජ්ය ආයතන ඒකාබද්ධ කරමින් තාක්ෂණික උපකාරක පද්ධති ක්රියාත්මක කර ඇති බව ඇය වැඩිදුරටත් පෙන්වා දුන්නාය.
ශ්රී ලංකා නව නිපැයුම්කරුවන්ගේ කොමිෂන් සභාව මගින් ජාතික ඉංජිනේරු පර්යේෂණ හා සංවර්ධන මධ්යස්ථානය මෙන්ම යාපනය, රජරට සහ රුහුණු විශ්වවිද්යාල ආශ්රිතව ‘Technology Incubation Centres’ ස්ථාපිත කර තිබේ. එමගින් මූලාකෘති සංවර්ධනය, නිෂ්පාදන සැලසුම්කරණය, ව්යාපාර සංවර්ධනය සහ බුද්ධිමය දේපළ කළමනාකරණය සඳහා අවශ්ය උපදේශන සේවා ලබා දීම සිදු කෙරේ. මීට අමතරව, විද්යා හා තාක්ෂණ අමාත්යාංශයේ විදාතා අංශය මගින් ක්රියාත්මක කරන ව්යාපෘති හරහා කුඩා හා මධ්ය පරිමාණ ව්යවසායකයන්ට තාක්ෂණික සහාය, තත්ත්ව පරීක්ෂණ සහ ව්යාපාර උපදේශන ලබා දෙන අතර, 2026 වර්ෂය තුළ වවුනියාව, රුහුණ සහ නැගෙනහිර විශ්වවිද්යාලවල මෙම මධ්යස්ථාන සාර්ථකව පවත්වාගෙන යනු ලබයි. ඉදිරියේදී ඌව වෙල්ලස්ස, රජරට සහ කැලණිය විශ්වවිද්යාලයන්හි ද එවැනි මධ්යස්ථාන ආරම්භ කිරීමට නියමිතය.
නවෝත්පාදකයන්ට අවශ්ය සහනදායී ප්රාග්ධනය සහ මූල්ය සහය ලබා දීම සඳහා ජාතික නව්යකරණ නියෝජිතායතනය මගින් ‘Innovation Voucher Schemes’ ක්රියාත්මක කරන අතර, ‘Innovative Bis’ ණය සහනාධාර සේවාව හරහා අඩු පොලී අනුපාත යටතේ ප්රාග්ධනය සැපයීමට ද කටයුතු යොදා ඇත. ආරම්භක ව්යවසායන් සඳහා රුපියල් මිලියනය දක්වා ආරම්භක ප්රාග්ධනය ලබාදීමට අයවැය යෝජනා සකස් කර ඇති අතර, ජාතික පර්යේෂණ සභාව සහ ජාතික විද්යා පදනම හරහා අපනයන වර්ධනයට අදාළ පර්යේෂණ දියත් කර ඇත. තවද, ඉන්දියානු රජයේ විද්යා හා තාක්ෂණ දෙපාර්තමේන්තුව සමඟ පර්යේෂණ ව්යාපෘති 16ක් සඳහා ගිවිසුම් අත්සන් කර ඇති අතර, තාක්ෂණික හුවමාරුව සඳහා ජාතික තාක්ෂණ හුවමාරු වේදිකාවක් ද මේ වන විට සංවර්ධනය කරමින් පවතී.
