ශ්රී ලංකාවට අයත් මුහුදු තීරයේ මත්ස්ය ගහනය අඩුවීම සම්බන්ධයෙන් ධීවරයින් විසින් නඟන ලද ගැටලුකාරී තත්ත්වයන් සැලකිල්ලට ගනිමින්, ඒ පිළිබඳව විද්යාත්මක වාර්තාවක් සකස් කරන ලෙස ධීවර අමාත්යාංශය විසින් ජාතික ජලජ සම්පත් පර්යේෂණ සහ සංවර්ධන නියෝජිතායතනයට (NARA) නියෝග කර තිබේ.
ධීවර නියෝජ්ය අමාත්ය රත්න ගමගේ මහතා ප්රකාශ කළේ ධීවරයින්ගේ අස්වැන්න අඩුවීම සම්බන්ධයෙන් මතුව ඇති තත්ත්වය පිළිබඳව නිවැරදි විද්යාත්මක දත්ත ලබාගැනීම අරමුණු කරගනිමින් මෙම පියවර ගත් බවයි. විශේෂයෙන්ම එල් නිනෝ (El Niño) කාලගුණ තත්ත්වයන් ශ්රී ලංකාවට අයත් මුහුදු තීරයේ මත්ස්ය සම්පතට සහ ධීවර අස්වැන්නට ඇති කර තිබෙන බලපෑම පිළිබඳවද පුළුල් ලෙස අධ්යයනය කරන ලෙස නාරා ආයතනයට දන්වා ඇත. මෙම විද්යාත්මක වාර්තාවේ නිර්දේශ මත පදනම්ව, අනාගත ධීවර කටයුතු සහ මත්ස්ය සම්පත් කළමනාකරණය සම්බන්ධයෙන් රජය විසින් ගත යුතු ඉදිරි ක්රියාමාර්ග පිළිබඳව අවධානය යොමු කරනු ඇත.
