ඌව පළාතේ බදුල්ල දිස්ත්රික්කයේ පළාත් සෞඛ්ය ක්ෂේත්රය මුහුණ දී ඇති දැවෙන ගැටලු හඳුනා ගනිමින් ඒවාට කඩිනම් සහ ස්ථිරසාර විසඳුම් ලබා දීමේ අරමුණින් රේඛීය අමාත්යාංශය සහ පළාත් සෞඛ්ය බලධාරීන් ඒකාබද්ධ වූ විශේෂ වැඩපිළිවෙළක් ක්රියාත්මක කිරීමට පියවර ගෙන තිබේ. සෞඛ්ය නියෝජ්ය අමාත්ය වෛද්ය හංසක විජේමුණි මහතාගේ ප්රධානත්වයෙන් ඌව පළාත් සභා ශ්රවණාගාරයේ දී පැවති මෙම උසස් පෙළ සාකච්ඡාව හරහා ජනතාවට ලැබෙන සෞඛ්ය සේවාවන්හි ගුණාත්මකභාවය ඉහළ නැංවීමේ ජාතික අවශ්යතාවය දැඩිව අවධාරණය කෙරිණි.
බදුල්ල දිස්ත්රික්කය තුළ පළාත් සභාව යටතේ ක්රියාත්මක වන සෞඛ්ය ආයතන 82ක් මුල් කරගනිමින් පවතින යටිතල පහසුකම් අඩාලවීම්, මානව සම්පත් ඌණතා, ඖෂධ හා වෛද්ය උපකරණ සැපයුමේ ඇති අභියෝග මෙන්ම ළමා පෝෂණය, ක්ෂය රෝග සහ ලිංගාශ්රිත රෝග පාලනය වැනි තීරණාත්මක සෞඛ්ය දර්ශක පිළිබඳව මෙහිදී පුළුල් ලෙස සමාලෝචනයට ලක් විය. මධ්යම රජයේ සහ පළාත් සභාවේ සම්පත් නිසි පරිදි සම්බන්ධීකරණය කරමින් රෝගී සත්කාර සේවා වඩාත් විධිමත් කිරීම සඳහා ගත යුතු ක්රියාමාර්ග සම්බන්ධයෙන් මෙහිදී විශේෂ අවධානයක් යොමු කරනු ලැබීය.
මෙම ඒකාබද්ධ යාන්ත්රණය තුළින් සෞඛ්ය ක්ෂේත්රයේ පවතින ව්යුහාත්මක ගැටලු ක්රමානුකූලව විසඳීමටත්, ප්රමුඛතා මත පදනම්ව අවශ්ය සම්පත් රෝහල් වෙත යොමු කිරීමටත් රේඛීය අමාත්යාංශයේ පූර්ණ දායකත්වය ලබා දෙන බව නියෝජ්ය අමාත්යවරයා මෙහිදී තහවුරු කළේය. ඉදිරියේදී පළාත් මට්ටමින් බෝවන හා බෝනොවන රෝග පාලනය සහ පෝෂණ වැඩසටහන් වඩාත් ශක්තිමත් කරමින්, දිස්ත්රික්කයේ සමස්ත ජනතාවට ප්රශස්ත මෙන්ම කාර්යක්ෂම සෞඛ්ය සේවාවක් අඛණ්ඩව ලබා දීමට අපේක්ෂිතය.
