පනවා ඇති බදු සංශෝධනවල සෘජු බලපෑම හේතුවෙන් 2022 වසරේ සිට 2025 වසර දක්වා වූ වසර තුනක කාලය තුළ මෙරට දුම්වැටි නිෂ්පාදනය සියයට 32කින් පමණ අඩුවී ඇති බව රජය විසින් පාර්ලිමේන්තුවේදී නිල වශයෙන් තහවුරු කර තිබේ. පාර්ලිමේන්තු මන්ත්රී දයාසිරි ජයසේකර මහතා යොමු කළ ප්රශ්නයකට පිළිතුරු ලබා දෙමින් ආර්ථික සංවර්ධන නියෝජ්ය අමාත්ය නිශාන්ත ජයවීර මහතා අනාවරණය කළ මෙම තොරතුරුත් සමඟින්, රාජ්ය බදු ප්රතිපත්තියේ සපලතාවය මෙන්ම මහජන සෞඛ්ය ප්රවර්ධන ඉලක්කයන් කෙරෙහි ක්ෂේත්රයේ දැඩි අවධානයක් යොමුවී ඇත.
මෙලෙස කෙටි කාලයක් තුළ දුම්වැටි නිෂ්පාදනය සැලකිය යුතු ප්රතිශතයකින් පහළ යාම රාජ්ය ආදායම් මාර්ග සහ මහජන සෞඛ්ය ක්ෂේත්රයේ ප්රගතිය කෙරෙහි සෘජුවම බලපාන සාධකයක් ලෙස විශ්ලේෂකයින් පෙන්වා දෙයි. බදු ප්රතිපත්තිය හරහා දුම්කොළ භාවිතය අවම කිරීමේ ජාතික අරමුණු සාක්ෂාත් කර ගැනීමට හැකිවී තිබුණ ද, මිල ඉහළ යාම හමුවේ අනීතික සහ නීතිවිරෝධී දුම්වැටි වෙළඳපොළ වර්ධනය වීමේ අවදානමක් ද නිර්මාණය විය හැකි බවට ක්ෂේත්රයේ විද්වතුන් පෙන්වා දෙයි.
මෙම තත්ත්වය හමුවේ, රාජ්ය බදු ආදායම් ආරක්ෂා කරගනිමින් මහජන සෞඛ්ය සුරක්ෂිත කිරීම සඳහා ඉදිරියේදී වඩාත් විධිමත් ප්රතිපත්තිමය යාන්ත්රණයක් ක්රියාත්මක කිරීම කෙරෙහි රජයේ අවධානය යොමු කෙරෙනු ඇත. ඉදිරි කාලපරිච්ඡේදය තුළදී දුම්කොළ භාවිතය තවදුරටත් පාලනය කිරීමට මෙන්ම වෙළඳපොළ තුළ සිදුවිය හැකි නීතිවිරෝධී ජාවාරම් මැඩලීම වෙනුවෙන් අදාළ ආයතනික සහ ආරක්ෂක පියවර තදින් ක්රියාත්මක කිරීමට බලධාරීන් අපේක්ෂා කරයි.
