දිවයින වටා වන මුහුදු ප්‍රදේශවල පවතින තද සුළං සහ රළු මුහුදු තත්ත්වය හේතුවෙන් නාවික, ධීවර සහ වෙරළබඩ ප්‍රජාව දැඩි අවධානයෙන් සිටින ලෙස කාලගුණ විද්‍යා දෙපාර්තමේන්තුව විශේෂ අනතුරු ඇඟවීමේ නිවේදනයක් නිකුත් කර තිබේ.
කාලගුණ විද්‍යා දෙපාර්තමේන්තුවට අනුව, හලාවත සිට කොළඹ සහ ගාල්ල හරහා මාතර දක්වා වන වෙරළට ඔබ්බෙන් වන මුහුදු ප්‍රදේශවල ස්වල්ප ස්ථානවල වැසි ඇති විය හැක. බටහිර සිට නිරිත දෙසට හමන සුළංවල වේගය පැයට කිලෝමීටර් 30ත් 40ත් අතර අගයක් ගනු ඇත.
කෙසේ වෙතත්, කාංකන්තුරේ සිට මන්නාරම හරහා හලාවත දක්වා සහ මාතර සිට හම්බන්තොට හරහා පොතුවිල් දක්වා වන මුහුදු ප්‍රදේශවල සුළගේ වේගය විටින් විට පැයට කිලෝමීටර් 50ත් 60ත් දක්වා වැඩි විය හැක. දිවයින වටා වන අනෙකුත් මුහුදු ප්‍රදේශවලද සුළගේ වේගය විටින් විට පැයට කිලෝමීටර් 45ත් 50ත් දක්වා වැඩි විය හැකි බැවින්, අදාළ මුහුදු ප්‍රදේශ විටින් විට රළු විය හැක.
මීට අමතරව, හලාවත සිට ගාල්ල සහ මාතර හරහා පොතුවිල් දක්වා වන වෙරළබඩ මුහුදු ප්‍රදේශවල රළ පහර මීටර් 2.5ත් 3.0ත් පමණ උසකට ඉහළ යාමට ඉඩ ඇත. බේරුවල සිට ගාල්ල හරහා මාතර දක්වා වන වෙරළබඩ ප්‍රදේශවල නියඟල රළ (Swell waves) හේතුවෙන් මුහුදු ජලය ගොඩබිමට ඒමේ හැකියාවක්ද පවතී.
මේ හේතුවෙන්, අදාළ මුහුදු ප්‍රදේශවල නිරත වන නාවික හා ධීවර ප්‍රජාව මෙන්ම වෙරළබඩ ප්‍රදේශවල ජීවත් වන ජනතාව දැඩි විමසිල්ලෙන් පසුවන ලෙස ඉල්ලා සිටී.
