ප්රවීණ මහාචාර්ය රත්නසිරි අරංගල විසින් සිය ෆේස්බුක් පිටුව හරහා එළිදක්වා ඇති පැරණි ලේඛන මඟින් මෙරට කලා ක්ෂේත්රයේ කලු පැල්ලමක් ලෙස සටහන් වූ අඳුරු යුගයක් යළිත් වරක් සමාජ මාධ්ය තුළ දැඩි කතාබහකට ලක්ව තිබෙනවා. එදා මෙරට අසමසම ගායන ශිල්පිනී ආචාර්ය නන්දා මාලනීයන්ගේ ගීත ගුවන් විදුලියෙන් ප්රචාරය කිරීම තහනම් කරමින් එවක ගෙන ගිය කුරිරු දේශපාලන සහ සංස්කෘතික වාරණය ‘ඇත්ත’ පුවත්පත විසින් කමිටු වාර්තා හා ප්රවෘත්ති හරහා නිර්භීතව හෙළිදරව් කළ ආකාරය මෙම පුවත්පත් පිටුවල ඉතා පැහැදිලිව සඳහන් වේ.
රටක සංස්කෘතියේ සහ ජන හදවත්වල අයිතිකාරිය වූ නන්දා මාලනියගේ හඬ යම් කිසි අදූරදර්ශී බලවේගයක උදහසට ලක් වෙමින්, ගුවන් විදුලියෙන් ඇයගේ ගීත ඇසීම පවා තහනම් කිරීමට තරම් එවක බලධාරීන් කටයුතු කිරීම රටම කම්පාවට පත් කළ කාරණයක් විය. කෙසේ වෙතත්, එම අසාධාරණයට එරෙහිව නැගී සිටි ‘ඇත්ත’ පුවත්පත, “නන්දා මාලනී ගී ප්රචාරය වැළැක්වීම ගුවන් විදුලිය හිතුවක්කාර වැඩක්: අනුමැති අණපනත්වල මන්ත්රී කඩයි” යනුවෙන් දැවැන්ත සිරස්තල යොදමින් මෙම අමන ක්රියාව හෙළි කළේය.
ප්රවෘත්ති වාර්තාවලට අනුව, ප්රවීණ ගායිකාවකගේ ගීත ගුවන් විදුලියෙන් ප්රචාරය කිරීම තහනම් කිරීම අමාත්ය මණ්ඩලයේ තීරණයක් යැයි පැවසුවද, පසුව පාර්ලිමේන්තුවේදී මන්ත්රීවරුන් නැගූ ප්රශ්න හමුවේ එවක අමාත්යවරුන් ඊට කිසිදු නිත්යානුකූල අනුමැතියක් හෝ ලිඛිත නියෝගයක් නොමැති බව පිළිගැනීමට සිදුව තිබේ. කලාකාරියකගේ ගායනය වසා දැමීමට ගත් එම උත්සාහය පාර්ලිමේන්තුව ඇතුළේද දැඩි විවාදයට තුඩු දුන් අතර, පුවත්පත් මඟින් එය දැඩි ලෙස හෙළා දකිනු ලැබීය.
ඉතිහාසයේ සැඟවී ගිය මෙවැනි අඳුරු පරිච්ඡේද වර්තමාන පරපුරට හෙළි වීම කලා ලෝකයේ මෙන්ම මාධ්ය ඉතිහාසයේ ද සුවිශේෂී හැරවුම් ලක්ෂයකි. කලාකරුවන්ගේ හඬ යටපත් කිරීමට උත්සාහ කළ ද, ජනතා හදවත්වල ඔවුන් දිනූ ස්ථානය කිසිදු බලවතෙකුට මැකී දැමිය නොහැකි බව මේ අපූරු අතීත සිදුවීම් මඟින් මනාව තහවුරු වේ.
