අධිකරණ විනිසුරුවරුන් විශ්රාම ගැන්වීමේ වයස ඉහළ නැංවීම සඳහා යෝජිත ආණ්ඩුක්රම ව්යවස්ථා සංශෝධනය මගින් අධිකරණයේ ස්වාධීනත්වයට කිසිදු බලපෑමක් සිදු නොවන බව ශ්රී ලංකා රජය එක්සත් ජාතීන්ගේ මානව හිමිකම් කොමිසම වෙත නිල වශයෙන් දැනුම් දී තිබේ. විනිසුරුවරුන්ගේ සහ නීතිඥයන්ගේ ස්වාධීනත්වය පිළිබඳ එක්සත් ජාතීන්ගේ විශේෂ වාර්තාකාරිනී මාග්රට් සැටර්ත්වේට් මහත්මිය විසින් යොමු කරන ලද විමසීමකට පිළිතුරු දෙමින් ජිනීවාහි ශ්රී ලංකා නිත්ය නියෝජිත කාර්යාලය හරහා පසුගිය 21 වැනිදා මෙම නිල ප්රතිචාරය යොමු කර ඇත.
මෙම සංශෝධනයේ ප්රධාන අරමුණ අධිකරණ පද්ධතිය තුළ පවතින අධික නඩු ගොඩගැසීම සහ නඩු ප්රමාදය අවම කරමින්, ජනතාවට අධිකරණයට ප්රවේශ වීමේ අයිතිය තහවුරු කිරීම බව රජය පෙන්වා දෙයි. යෝජිත නව සංශෝධනයට අනුව ශ්රේෂ්ඨාධිකරණ විනිසුරුවරුන්ගේ අනිවාර්ය විශ්රාම වයස අවුරුදු 65 සිට 67 දක්වා ඉහළ නැංවෙන අතර, අගවිනිසුරුවරයාගේ ධුර කාලය වසර 7ක් හෝ වයස අවුරුදු 67 සම්පූර්ණ වීම යන කරුණු දෙකෙන් පළමුව සිදුවන අවස්ථාවේදී අවසන් වන බවද එහි දැක්වේ. මීට අමතරව, අභියාචනාධිකරණ විනිසුරු විශ්රාම වයස අවුරුදු 63 සිට 65 දක්වාද, මහාධිකරණ විනිසුරු විශ්රාම වයස අවුරුදු 61 සිට 63 දක්වාද ඉහළ නැංවෙන අතර අනෙකුත් සියලුම පහළ අධිකරණ විනිසුරුවරුන්ගේ සහ මහේස්ත්රාත්වරුන්ගේ අනිවාර්ය විශ්රාම වයස අවුරුදු 62 ලෙස ඒකාබද්ධ කෙරේ.
මෙම සංශෝධනය කිසිදු ලෙසකින් විධායකයේ බලපෑම මත හෝ දේශපාලන වාසි ලබාගැනීමේ අරමුණින් සකස් කර නොමැති බව රජය අවධාරණය කරයි. ජාත්යන්තර ප්රමිතීන්ට අනුව විශ්රාම වයස ඉහළ නැංවීම අධිකරණ ස්වාධීනත්වයට බාධාවක් නොවන බවත්, විධායකයට තමන්ට රුචි පරිදි තනි තනි විනිසුරුවරුන්ගේ සේවා කාලය දීර්ඝ කිරීමට මෙයින් ඉඩක් නොලැබෙන බවත් රජය වැඩිදුරටත් පෙන්වා දී ඇත.
