ඓතිහාසික සේරුවිල ශ්රී ලලාට ධාතු මහා පෙරහර මංගල්යයට සමගාමීව නැගෙනහිර වෙරළ තීරයේ වාසය කරන මුහුදු ආදිවාසී ජනතාවගේ වාර්ෂික මීපැණි පූජාව අද (29) උදෑසන අතිශය භක්ත්යනුකූලව පවත්වන ලදී.
දමිළ භාෂාව භාවිත කරන මුහුදු ආදිවාසී නායක නඩරාජා කනගරත්නම් ඇතුළු පිරිස විසින් ඉතා ගෞරවයෙන් රැගෙන ආ මීපැණි කලය සේරුවිල මංගල රාජමහා විහාරාධිපති පූජ්යපාද අලුදෙණියේ සුබෝධි නාහිමිපාණන් වහන්සේ වෙත චාරිත්රානුකූලව භාරදීම මෙහිදී සිදු කෙරිණි. අනතුරුව මංගල මහා සෑය වටා ප්රදක්ෂිණා කර වන්දනා කිරීමෙන් පසුව මෙම මීපැණි පූජාව සිදු කර ඇත.
මුහුදු ආදිවාසී ජනතාවට පහසුවෙන් අවබෝධ කරගත හැකි පරිදි සියලු පූජා කටයුතු සිංහල සහ දමිළ භාෂා දෙකෙන්ම පැවැත්වීමට සේරුවිල නාහිමිපාණන් වහන්සේ කටයුතු කර තිබීම විශේෂත්වයකි. නැගෙනහිර පළාත් ආණ්ඩුකාර මහාචාර්ය ජයන්තලාල් රත්නසේකරගේ උපදෙස් මත නැගෙනහිර පළාත් සංස්කෘතික කටයුතු දෙපාර්තමේන්තුව විසින් මෙම අවස්ථාවේ සම්බන්ධීකරණ කටයුතු සාර්ථකව සිදු කරනු ලැබීය. පින්කම අවසානයේ සේරුවිල නාහිමිපාණන් වහන්සේ ප්රමුඛ මහා සංඝරත්නය විසින් මුහුදු ආදිවාසී ජනතාවට පිරිත් නූල් පැළඳුවා සෙත් පතා ආශීර්වාද කළහ.
වෙරුගල් සහ මූතූර් ඇතුළු ප්රදේශවල ගම්මාන 27ක් පුරා ව්යාප්තව සිටින මෙම ජනතාව, සේරුවිල ශ්රී ලලාට ධාතු මහා පෙරහර මංගල්යයේදී ඔවුන්ගේ පාරම්පරික නර්තන ඉදිරිපත් කිරීමද සිදු කරනු ලබයි. විවිධ සමාජ හා භාෂාමය හේතු මත සමාජයෙන් යම් දුරස්ථභාවයකට පත්ව සිටින මෙම ජන කොට්ඨාසය ප්රධාන ධාරාවට සමීප කරවමින්, ඔවුන්ගේ ගැටලු විසඳීමට සේරුවිල නාහිමිපාණන් වහන්සේ නිරන්තරයෙන්ම අගය කළයුතු මැදිහත්වීමක් සිදු කරමින් සිටිති.
