මහමඟ ගමන් ගත් කාන්තාවන්ගේ ගෙල බැඳි රන්මාල කොල්ලකෑමේ නිරත වූ පුද්ගලයන් දෙදෙනෙකු ඇතුළු සිව්දෙනෙකු රුපියල් මිලියන දෙකකට ආසන්න වටිනාකමකින් යුතු ස්වර්ණාභරණ තොගයක් සමඟ හොරණ මූලස්ථාන පොලීසිය විසින් අත්අඩංගුවට ගෙන තිබේ.
අඟුරුවාතොට, නාර්තුපාන සහ හොරණ, බැල්ලපිටිය ප්රදේශවල පදිංචි 23 සහ 25 යන වයස්වල පසුවන තරුණයන් දෙදෙනෙකු මෙලෙස අත්අඩංගුවට ගෙන ඇති අතර, අපරාධ සඳහා ආධාර අනුබල දීමේ චෝදනාව මත ඔවුන්ගේ මව සහ නැන්දා වන වයස්ගත කාන්තාවන් දෙදෙනෙකුද පොලිස් භාරයට පත්ව ඇත. සැකකරුවන් අත්අඩංගුවට ගන්නා අවස්ථාවේදී එක් අයෙකු සොරාගත් රන් මාලයක් ගිල දමා ඇති අතර, පසුව රෝහල්ගත කර සිදුකළ ස්කෑන් පරීක්ෂණයකින් ඒ බව සනාථ වී තිබේ.
පසුගිය 25 වැනිදා සිට සතියක කාලයක් තුළ හොරණ සහ අවට ප්රදේශවල මෙම කොල්ලකෑම් සිදුකර ඇති අතර, ගර්භණී මවකගේද රන් මාලයක් මොවුන් විසින් පැහැරගෙන ඇත. ව්යාජ අංක තහඩු සවි කළ යතුරුපැදි භාවිත කරමින් මෙම අපරාධ සිදුකර ඇති අතර, සොරාගත් රන් භාණ්ඩ මව්වරුන් ලවා උකස් කර ලබාගත් මුදලින් මිලදී ගත් යතුරුපැදි සහ අපරාධයට භාවිත කළ යතුරුපැදියද පොලිස් භාරයට ගෙන තිබේ. හොරණ මූලස්ථාන පොලිස් පරීක්ෂක සමන් රෝහණ මහතාගේ මෙහෙයවීමෙන් මේ පිළිබඳ වැඩිදුර විමර්ශන ක්රියාත්මකය.
