උතුරු කොරියාවේ පාලක කම්කරු පක්ෂයේ (Workers’ Party of Korea) ව්යවස්ථාවට සහ රීතිවලට සිදුකර ඇති නව සංශෝධන මගින් එරට නායක කිම් ජොං උන් (Kim Jong Un) වෙත හිමිවන බලතල සහ පාලනය තවදුරටත් තහවුරු කර ඇති බව දකුණු කොරියානු ජාතික බුද්ධි සේවයට (NIS) අනුබද්ධ ජාතික ආරක්ෂක උපායමාර්ග ආයතනය (INSS) වාර්තා කරයි.
පසුගිය පෙබරවාරි මාසයේ පැවැති පාලක පක්ෂයේ 09 වැනි සම්මේලනයේදී මෙම නව ව්යවස්ථා සංශෝධන සම්මත කරගෙන තිබේ. ඒ අනුව පක්ෂයේ මහලේකම් ධුරය දරන කිම් ජොං උන් වෙත දේශපාලන මණ්ඩල (Politburo) රැස්වීම් කැඳවීමට සහ මුලසුන දැරීමට, ජ්යෙෂ්ඨ නිලධාරීන් පත් කිරීමට සහ ඉවත් කිරීමට, පක්ෂ සාමාජිකයන් ඇතුළත් කරගැනීමට හෝ නෙරපා හැරීමට මෙන්ම පක්ෂ සංවිධාන විසුරුවා හැරීමට සෘජු හා පූර්ණ බලතල හිමිවී ඇත. මීට අමතරව හදිසි යුධ තත්ත්වයකදී පක්ෂයේ මධ්යම කාරක සභාව වෙනුවට කුඩා ජ්යෙෂ්ඨ නිලධාරීන් පිරිසකින් සමන්විත දේශපාලන මණ්ඩලයට තීරණ ගැනීමේ බලය පවරා තිබේ.
විශේෂයෙන්ම මෙම නව රීති පද්ධතිය තුළින් උතුරු කොරියාවේ නිර්මාතෘ කිම් ඉල් සුං සහ හිටපු නායක කිම් ජොං ඉල්ගේ නාමයන් සහ පැරණි ප්රතිපත්තිමය සඳහන් කිරීම් ඉවත් කර ඇති අතර, කිම් ජොං උන්ගේ ඒකාධිපති නායකත්වය පමණක් ඉහළින්ම ඔසවා තබා ඇත. එසේම පක්ෂ සාමාජිකත්වය ලබාගැනීමේ අවම වයස අවුරුදු 18 සිට 20 දක්වා ඉහළ නංවා ඇති අතර, දකුණු කොරියාව සමඟ පැවැති සාමකාමී එක්සත් වීමේ ප්රතිපත්තිය අත්හැරීමේ සංශෝධනය ද මෙයට ඇතුළත් වේ.
තොරතුරු උපුටා ගැනීම: Reuters ඇසුරින්
