ජනාධිපති අනුර කුමාර දිසානායක මහතාගේ නායකත්වය යටතේ ශ්රී ලංකාව පොහොසත් රටක් සහ ලස්සන ජීවිතයක් කරා යන පරිවර්තනීය මාවතකට පිවිස ඇති බව ඉන්දීය මහ කොමසාරිස් සන්තෝෂ් ජා මහතා ප්රකාශ කර තිබේ. මන්නාරම දිස්ත්රික් මහ රෝහලේ හදිසි අනතුරු සහ හදිසි ප්රතිකාර ඒකකයේ ඉදිකිරීම් කටයුතු ජනාධිපති අනුර කුමාර දිසානායක මහතාගේ ප්රධානත්වයෙන් අද (16) පෙරවරුවේ ආරම්භ කෙරුණු අතර, එම අවස්ථාවට එක්වෙමින් ඔහු මෙම අදහස් පළ කළේය.
ශ්රී ලංකාවේ සියලු පළාත්වල මෙන්ම උතුරු පළාතේද සංවර්ධනය වෙනුවෙන් ජනාධිපතිවරයා දක්වන උනන්දුව ඉන්දියාව අගය කරන බවත්, එම දැක්ම යථාර්ථයක් බවට පත් කිරීම සඳහා ජනාධිපතිවරයා සමග කටයුතු කිරීමට ලැබීම පිළිබඳව සතුටු වන බවත් ඒ මහතා සඳහන් කර ඇත. මන්නාරම හදිසි ප්රතිකාර ඒකකය සඳහා වන ගිවිසුම ජනාධිපති අනුර කුමාර දිසානායක මහතාගේ නායකත්වය යටතේ අත්සන් තැබූ බවත්, එම කටයුත්ත වෙනුවෙන් ඉන්දීය අග්රාමාත්ය නරේන්ද්ර මෝදි මහතා ද දැඩි කැපවීමකින් කටයුතු කළ බවත් ඉන්දීය මහ කොමසාරිස්වරයා පෙන්වා දී තිබේ.
ශ්රී ලංකාවේ සංවර්ධනයට සහාය ලබාදීම ඉන්දියාව සලකන්නේ පවුලේ සාමාජිකයෙකු වෙනුවෙන් ඉටු කරන යුතුකමක් මෙන්ම විශාල වගකීමක් ලෙස බව සන්තෝෂ් ජා මහතා වැඩිදුරටත් සඳහන් කර ඇති අතර, ශ්රී ලංකාවේ සියලු ජන කොටස්වල යහපැවැත්ම සහ තිරසාර ප්රගතිය වෙනුවෙන් ශ්රී ලංකා රජය සමග ඉදිරියටත් එක්ව කටයුතු කිරීමට ඉන්දියාව සූදානම් බවද ප්රකාශ කර ඇත.
