දිට්වා සුළි කුණාටුවෙන් හානි වූ මෙරට ප්‍රධාන පාලම් 14ක් ප්‍රතිසංස්කරණය කිරීම සඳහා චීන ආධාර යටතේ ක්‍රියාත්මක කිරීමට නියමිත ව්‍යාපෘතියට අදාළ ගිවිසුමට ශ්‍රී ලංකාව සහ චීනය අත්සන් තබා තිබෙනවා.
ගිවිසුමට ඊයේ (28) කොළඹ ප්‍රවාහන, මහාමාර්ග සහ නාගරික සංවර්ධන අමාත්‍යාංශයේදී ශ්‍රී ලංකාවේ චීන තානාපති වෙයි හුවාෂියං මහතා සහ එම අමාත්‍යාංශයේ ලේකම් ආසිරි කරුණාවර්ධන මහතා අත්සන් තබා තිබෙනවා.
චීන රජය මෙම ව්‍යාපෘතිය සඳහා රෙන්මින්බි මිලියන 79ක මූල්‍ය ආධාරයක් ලබාදීමට එකඟ වී ඇති අතර, ව්‍යාපෘතිය අදියර දෙකක් යටතේ ක්‍රියාත්මක කිරීමට සැලසුම් කර තිබෙනවා. පළමු අදියර යටතේ පාලම් 9ක් මාස 18ක කාලයක් තුළ ප්‍රතිසංස්කරණය කිරීමට නියමිතයි.
ශ්‍රී ලංකා රජය කළ ඉල්ලීමකට අනුව චීන විශේෂඥ කණ්ඩායමක් මෙරටට පැමිණ ක්ෂේත්‍ර පරීක්ෂණ සිදුකිරීමෙන් අනතුරුව ව්‍යාපෘතියේ අනුමත කිරීමේ ක්‍රියාවලිය කඩිනම් කළ බව චීන තානාපතිවරයා සඳහන් කර තිබෙනවා.
අමාත්‍යාංශ ලේකම් ආසිරි කරුණාවර්ධන මහතා සඳහන් කර ඇත්තේ, මෙම ව්‍යාපෘතිය පශ්චාත් ආපදා ප්‍රවාහන දුෂ්කරතා අවම කිරීමට මෙන්ම ශ්‍රී ලංකාවේ ප්‍රවාහන යටිතල පහසුකම් වැඩිදියුණු කිරීමටද දායක වනු ඇති බවයි.
2025 නොවැම්බර් අග සිට දෙසැම්බර් මුල දක්වා ශ්‍රී ලංකාවට බලපෑ දිට්වා සුළි කුණාටුව හේතුවෙන් පුද්ගල මරණ 600කට අධික සංඛ්‍යාවක් වාර්තා වූ අතර, ආර්ථික හා යටිතල පහසුකම් හානිය අමෙරිකානු ඩොලර් බිලියන 4.1ක් පමණ ලෙස ඇස්තමේන්තු කර තිබෙනවා.
