ශ්‍රී ලංකාවේ මෝටර් රථ වෙළඳපොළට යළි ප්‍රවිශ්ට වෙමින් සිටින Renault සමාගම, සිය නවතම මාදිලි පාරිභෝගිකයන්ට හඳුන්වාදීම සඳහා කොළඹ මැජෙස්ටික් සිටි පරිශ්‍රයේ නව Renault අත්දැකීම් මධ්‍යස්ථානයක් විවෘත කර තිබෙනවා.
මෙම මධ්‍යස්ථානය Associated Motorways Private Limited (AMW) සමාගමේ සමූහ කළමනාකාර අධ්‍යක්ෂ ජවහර් ගනේෂ් මහතා සහ විකුණුම් අධ්‍යක්ෂ ප්‍රසන්න ද සිල්වා මහතා විසින් නිල වශයෙන් විවෘත කර තිබෙනවා.
මැජෙස්ටික් සිටිහි ලොබියේ පිහිටා ඇති මෙම මධ්‍යස්ථානයේ ශ්‍රී ලංකා වෙළඳපොළට හඳුන්වාදීමට නියමිත Renault Kwid, Renault Kiger සහ Renault Triber යන මාදිලි ප්‍රදර්ශනය කෙරෙනවා.
පාරිභෝගික පහසුව වෙනුවෙන් ප්‍රමාණවත් වාහන තොගයක් AMW සතුව පවතින බවත්, අවශ්‍ය ලේඛන සහ ලියාපදිංචි කටයුතු සම්පූර්ණ කිරීමෙන් පසු දිනක් වැනි කෙටි කාලයක් තුළ තම වාහනය ලබාගැනීමේ හැකියාව පවතින බවත් සමාගම සඳහන් කරනවා.
එමෙන්ම Renault වාහන සඳහා වසර තුනක නිෂ්පාදක වගකීමක් ලබාදෙන අතර, අලෙවියෙන් පසු සේවා සහ වෘත්තීයමය සහායද පාරිභෝගිකයන්ට ලබාදීමට කටයුතු කර තිබෙනවා.
AMW සමූහ කළමනාකාර අධ්‍යක්ෂ ජවහර් ගනේෂ් මහතා සඳහන් කළේ Renault සන්නාමය යළි ශ්‍රී ලංකාවට හඳුන්වාදීමත් සමඟ නව අත්දැකීම් මධ්‍යස්ථානය විවෘත කිරීම මඟින් එහි නවීන වාහන අත්විඳීමට පාරිභෝගිකයන්ට වැඩි අවස්ථාවක් හිමිවන බවයි.
ප්‍රංශයේදී 1898 වසරේ ආරම්භ වූ Renault සමාගම වසර 125කට අධික ඉතිහාසයක් සහිත ජාත්‍යන්තර මෝටර් රථ සන්නාමයක් ලෙස කටයුතු කරන බවද සඳහන්.
