දෙපාර්ශ්වය අතර මාස හතක කාලයක් පුරා ක්‍රියාත්මක වන ගැටුම අවසන් කර කලාපීය ස්ථාවරත්වය තහවුරු කිරීම සඳහා ඉරානය විසින් සිය න්‍යෂ්ටික ඉන්ධන පොහොසත් කිරීමේ ධාරිතාව දැඩි හා අර්ථවත් ලෙස අඩු කිරීම අත්‍යවශ්‍ය බව අමෙරිකානු උප ජනපති ජේ.ඩී. වැන්ස් රොයිටර් පුවත් සේවය සමඟ පැවති විශේෂ සම්මුඛ සාකච්ඡාවකදී අවධාරණය කර තිබේ. ටෙහෙරානය සමඟ පවතින සාකච්ඡා සම්බන්ධයෙන් වොෂින්ටන් පාලනය තවදුරටත් දැඩි ස්ථාවරයක සිටින බව පෙන්වා දෙනු ලබන හෙතෙම, න්‍යෂ්ටික අවියක් නිෂ්පාදනය නොකිරීමේ සැබෑ කැපවීම පෙන්වීම සඳහා ඉරානය 60% ක් වැනි ඉහළ මට්ටමකින් ඉන්ධන පොහොසත් කිරීම වහා අත්හැර දැමිය යුතු බවට දැඩි කොන්දේසි පනවා ඇත.
ගෝලීය බලශක්ති වෙළඳපොළ දැඩි කම්පනයකට ලක් කර ඇති මෙම යුද තත්ත්වය ඉදිරි අමෙරිකානු මධ්‍යකාලීන මැතිවරණ හමුවේ රිපබ්ලිකන් පක්ෂයට දේශපාලනික වශයෙන් දැඩි අභියෝගයක් වී ඇති පසුබිමක, මෙම සාම සාකච්ඡා ඉදිරියට ගෙනයාම අතිශය සංකීර්ණ වී තිබේ. ඉරාන ජනාධිපති මසූඩ් පෙසෙෂ්කියන් සහ විදේශ අමාත්‍ය අබ්බාස් අරක්චි සමඟ රාජ්‍ය තාන්ත්‍රික මට්ටමින් සාකච්ඡා පවත්වාගෙන ගියද, ඉරාන ඉහළ පෙළේ බල ව්‍යුහය තුළ අවසන් තීරණ ගන්නා සැබෑ පාර්ශ්වය කුමක්ද යන්න පිළිබඳව අමෙරිකාවට තවමත් පැහැදිලි අවබෝධයක් නොමැති වීම මෙම ගැටුම විසඳාගැනීමට ඇති ප්‍රධානම බාධාව බව උප ජනපතිවරයා මෙහිදී පෙන්වා දී තිබේ.
වචනවලට පමණක් සීමා වූ එකඟතාවලට අමෙරිකාව තවදුරටත් සූදානම් නැති බව පවසමින් වොෂින්ටන් පාලනය ස්ථිර හා සත්‍ය ක්‍රියාමාර්ග අපේක්ෂා කරන බව හෙතෙම වැඩිදුරටත් කියා සිටියේය. ඉදිරි කාලය තුළ ටෙහෙරාන් පාලනය මෙම කොන්දේසි හමුවේ දැක්වන ප්‍රතිචාරය මත හෝමූස් සමුද්‍ර සන්ධිය ඇතුළු සමුද්‍රීය මාර්ගවල ආරක්ෂාව මෙන්ම මැදපෙරදිග යුද්ධයේ ඉදිරි ගමන් මඟ සම්පූර්ණයෙන්ම තීරණය වනු ඇතැයි ජාත්‍යන්තර දේශපාලන විචාරකයෝ පෙන්වා දෙති.
