හූති කැරලිකරුවන් විසින් අඛණ්ඩව එල්ල කරනු ලබන දැඩි ප්‍රහාර හමුවේ සෞදි අරාබියේ ප්‍රධාන ජාත්‍යන්තර ගුවන් තොටුපොළ කිහිපයකම මෙහෙයුම් කටයුතුවලට බරපතළ බාධා එල්ල වී ඇති අතර, රියාද් අගනුවර පිහිටි කිං කාලිඩ් ජාත්‍යන්තර ගුවන් තොටුපොළේ මෙන්ම දම්මාම් ගුවන් තොටුපොළේ ද ගුවන් ගමන් මෙහෙයුම් සම්පූර්ණයෙන්ම අත්හිටුවීමට බලධාරීන් පියවර ගෙන තිබේ. කලාපීය ආරක්ෂාව දැඩි අර්බුදයකට ලක් කරමින් එල්ල වන මෙම ප්‍රහාර හේතුවෙන් ඉකුත් පැය කිහිපය තුළ සෞදි අරාබියේ ගුවන් අවකාශය අතිශයින් අවදානම් සහගත තත්ත්වයකට පත්ව ඇති අතර, ජෙඩා ගුවන් තොටුපොළේ ද නියමිත ගුවන් ගමන්වලින් සැලකිය යුතු ප්‍රතිශතයක් අවලංගු කිරීමට හා ප්‍රමාද කිරීමට සිදුවීමත් සමග මධ්‍යම පූර්ව කලාපීය ගුවන් ප්‍රවාහන ජාලයම දැඩි අඩාල වීමකට ලක්ව ඇත.
මෙම හදිසි තත්ත්වය මත ජෙඩා ගුවන් තොටුපොළේ පමණක් නියමිත ගුවන් ගමන් 156ක් එනම් සියයට විස්සක ප්‍රමාණයක් සම්පූර්ණයෙන්ම අවලංගු කර ඇති අතර, තවත් ගුවන් ගමන් 374ක් හෙවත් සියයට හතළිස් නවයකට ආසන්න ප්‍රමාණයක් දැඩි ප්‍රමාදයකට ලක්ව ඇති බව විදෙස් වාර්තා තහවුරු කරයි. දම්මාම් ගුවන් තොටුපොළ වෙත ඉකුත් පැය කිහිපය තුළ කිසිදු ගුවන් යානයක් ගමනාගමනයේ යෙදී නොමැති වීම සහ ගොඩබස්වා ඇත්තේ සීමිත ගුවන් යානා ප්‍රමාණයක් පමණක් වීම තුළින් සෞදි අරාබියේ අභ්‍යන්තර හා බාහිර ගුවන් සබඳතාවන්ට එල්ල වී ඇති දැඩි බලපෑම මනාව පැහැදිලි වේ. සෞදි අරාබියට සහ එරටින් පිටතට ගමන් කිරීමට අපේක්ෂා කරන ජාත්‍යන්තර මගීන්ට මෙන්ම ශ්‍රී ලංකාව ඇතුළු විදෙස් රටවල ප්‍රවාහන සේවාවලටද මෙම අර්බුදය හරහා බරපතළ සැපයුම් සහ මෙහෙයුම් ගැටලු මතුව තිබේ.
කලාපීය යුධ උණුසුම තවදුරටත් ව්‍යාප්ත වෙමින් පවතින පසුබිමක, ආරක්ෂක තත්ත්වය සම්පූර්ණයෙන්ම පාලනයකට ලක්වන තෙක් ගුවන් තොටුපොළ මෙහෙයුම් යථා තත්ත්වයට පත් කිරීම අවිනිශ්චිත වී ඇති අතර, සෞදි බලධාරීන් ඉල්ලා සිටින්නේ මගීන් ගුවන් තොටුපොළ වෙත යාමට පෙර අදාළ ගුවන් සමාගම් හරහා තම ගුවන් ගමන් වාර පිළිබඳව නැවත තහවුරු කර ගන්නා ලෙසය. ඉදිරියේදී මෙම ගුවන් තොටුපොළ ආරක්ෂාව තවදුරටත් තර කිරීමට සහ කලාපීය ගුවන් අවකාශයේ සුරක්ෂිතභාවය තහවුරු කිරීමට ගෙන යන ක්‍රියාමාර්ග මත ජාත්‍යන්තර ගුවන් ගමන්වල අනාගතය තීරණය වනු ඇත.
