ඉන්දියාවේ මහාරාෂ්ට්‍ර ප්‍රාන්ත රාජ්‍ය සේවා කොමිෂන් සභාවේ (MPSC) බඳවා ගැනීම් හා විභාග ප්‍රශ්න පත්‍ර පිටවීම සම්බන්ධයෙන් මතු වූ චෝදනා පිළිබඳ විමර්ශනයක් පැවැත්වීමට රජය කමිටුවක් පත් කිරීමෙන් අනතුරුව, දින 10ක් පුරා පැවති සිසු විරෝධතාව අවසන් කිරීමට තීරණය කර තිබේ.
පූනේ නගරයේ එස්. එම්. ජෝෂි පාලම ආසන්නයේ පැවති විරෝධතාව අවසන් කිරීමේ තීරණය ගෙන ඇත්තේ රජයේ නියෝජිතයන් සහ විභාග අපේක්ෂකයන් අතර පැවති සාකච්ඡාවකින් පසුවය.
ලබාදී ඇති වාර්තාවට අනුව, හිටපු විනිසුරු දිලිප් බොසාල්ගේ සභාපතිත්වයෙන් යුත් කමිටුවට ජ්‍යෙෂ්ඨ IAS නිලධාරී තුකාරාම් මුන්ඩේ ඇතුළු නිලධාරීන් පත් කර තිබේ.
විරෝධතාකරුවන්ගේ ප්‍රධාන ඉල්ලීම් අතර MPSC සභාපති විවේක් භිමන්වාර් එම ධුරයෙන් ඉවත් කිරීම ද ඇතුළත් විය. වාර්තාවට අනුව, පරීක්ෂණය අවසන් වනතුරු ඔහු නිවාඩු ලබාගැනීමට තීරණය කර තිබේ.
එමෙන්ම විරෝධතාවට අදාළව නඩු ඉවත් කිරීම, ඉදිරි වසර තුන තුළ තනතුරු 70,000ක් සඳහා බඳවා ගැනීම් සිදු කිරීම සහ Group C විභාගයට අදාළ බඳවා ගැනීමේ අවස්ථා වැඩි කිරීම ද අපේක්ෂකයන්ගේ ඉල්ලීම් අතර වේ.
