සමගි ජන බලවේගයේ මහ ලේකම්, පාර්ලිමේන්තු මන්ත්‍රී රංජිත් මද්දුමබණ්ඩාර මහතා ඇතුළු මන්ත්‍රීවරුන් පිරිසක් මල්වතු සහ අස්ගිරි පාර්ශ්වයන්හි මහනායක හිමිවරුන් බැහැදැක සාකච්ඡා පවත්වා තිබේ.
ආන්දෝලනයකට ලක්ව ඇති ආගමික සහ ශාසනික කරුණු සම්බන්ධයෙන් සාකච්ඡා කිරීම සඳහා මල්වතු මහා විහාර පාර්ශ්වයේ මහානායක අතිපූජ්‍ය තිබ්බටුවාවේ ශ්‍රී සුමංගල මහනායක හිමියන් බැහැදැකීමට ගිය අවස්ථාවේදී උන්වහන්සේ මෙම අදහස් පළ කර ඇත. වත්මන් ආණ්ඩුව විසින් දළදා මාලිගාවට ප්‍රහාර එල්ල කර ඇති බවට රංජිත් මද්දුමබණ්ඩාර මන්ත්‍රීවරයා කළ ප්‍රකාශයේදී, වෙනත් පාර්ශ්ව පවසන පමණින් එලෙස ප්‍රකාශ කළ නොහැකි බව මහනායක හිමියන් පෙන්වා දී තිබේ. එසේම, රට නිරාගමික රාජ්‍යයක් කිරීමට ආණ්ඩුව කටයුතු කරන බවට මන්ත්‍රීවරුන් කළ ප්‍රකාශයට පිළිතුරු ලබා දෙමින්, පෙරහැර නතර කරනවා යැයි පැවසුවද එය නතර කර නොමැති බවත්, වත්මන් පාලකයන් ආගමික උත්සවවලටත් නිතිපතා සහභාගී වන බවත් මහනායක හිමියන් එහිදී පවසා ඇත.
