ශ්‍රී ලංකා මෝටර් රථ රේස් රියැදුරු යෙවන් දාවිඩ් 2027 FIA ෆෝමියුලා 3 ශූරතාවලිය සඳහා වැන් අමර්ස්ෆෝර්ට් රේසිං (VAR) කණ්ඩායම සමඟ ගිවිසුම්ගත වී ඇති අතර, ඒ හරහා ඔහු අඛණ්ඩව දෙවන වරටත් එම තරගබිම සඳහා තම ස්ථානය තහවුරු කර ගෙන තිබේ.
මෙම වසරේ (2026) පැවති සිය මංගල තරග වාරය තුළ ප්‍රසාද ලකුණු 35ක් ලබා ගනිමින් රියැදුරන්ගේ ශූරතාවලියේ 18 වැනි ස්ථානය දිනා ගැනීමට සමත් වූ 19 හැවිරිදි වියේ පසුවන යෙවන් දාවිඩ්, සිල්වර්ස්ටෝන් හි පැවති ස්ප්‍රින්ට් තරගයේදී දෙවැනි ස්ථානය දිනා ගැනීමෙන් සිය කැපී පෙනෙන දක්ෂතා පෙන්නුම් කළේය. ෆෝමියුලා 3 වෙත පිවිසීමට පෙර, ඔහු 2025 යුරෝෆෝමියුලා ඕපන් ශූරතාවලියේදී ජයග්‍රහණ 6ක් සහ වේදිකාවට පිවිසීම් 14ක් සමඟ සමස්ත තරගාවලියේ දෙවැනි ස්ථානය දිනා ගැනීමටද සමත් විය. කණ්ඩායමේ නායකත්වය සහ තරගකාරී ප්‍රවේශය අගයමින් මෙම පියවර තැබූ බව යෙවන් දාවිඩ් ප්‍රකාශ කර ඇති අතර, ඔහුගේ දක්ෂතා අගයමින් වැන් අමර්ස්ෆෝර්ට් රේසිං කණ්ඩායම් ප්‍රධානී බ්‍රැඩ් ජොයිස් ඔහුට සුබ පැතුම් එක් කර තිබේ.
