ශ්‍රී ලංකාවේ ඩිජිටල් ආර්ථිකය සංවර්ධනය කිරීම සහ කෘත්‍රිම බුද්ධි (AI) ක්ෂේත්‍රයේ සහයෝගීතාව පුළුල් කිරීම අරමුණු කරගනිමින්, ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා සහ ශ්‍රී ලංකාවේ චීන තානාපති වේයි හුවාෂියැං මහතා අතර විශේෂ සාකච්ඡාවක් පවත්වා තිබේ.
ඊයේ (14) කොළඹ පිහිටි ඩිජිටල් ආර්ථික අමාත්‍යාංශයේදී පැවති මෙම හමුවේදී, ශ්‍රී ලංකාවේ ඩිජිටල් පරිවර්තනය, AI තාක්ෂණය භාවිතය සහ දෙරට අතර තාක්ෂණික සහයෝගීතාව වර්ධනය කිරීම පිළිබඳව අවධානය යොමු විය.
එහිදී ජාතික මට්ටමේ ස්වෛරී AI පරිගණක මධ්‍යස්ථානයක් පිහිටුවීම සඳහා චීනයේ සහාය ලබාගැනීම සහ AI ක්ෂේත්‍රය සම්බන්ධයෙන් දෙරට අතර අවබෝධතා ගිවිසුමකට එළඹීම පිළිබඳවද සාකච්ඡා කර තිබේ.
AI දත්ත මධ්‍යස්ථානයක් පිහිටුවීම, පර්යේෂණ හා සංවර්ධන කටයුතු පුළුල් කිරීම, මානව සම්පත් හා තාක්ෂණික ධාරිතාව වර්ධනය කිරීම සහ නව ආයෝජන අවස්ථා හඳුනාගැනීම කෙරෙහිද නියෝජ්‍ය අමාත්‍යවරයාගේ අවධානය යොමු වී ඇත.
චීන තානාපතිවරයා සඳහන් කර ඇත්තේ රබර් සහ වී වගාව වැනි සාම්ප්‍රදායික කර්මාන්ත සඳහාද AI තාක්ෂණය යොදාගැනීම සම්බන්ධයෙන් චීනය ලබා ඇති අත්දැකීම් ශ්‍රී ලංකාව සමඟ බෙදාගැනීමට සූදානම් බවයි. එමෙන්ම, යෝජිත AI පරිගණක මධ්‍යස්ථානය සම්බන්ධ තාක්ෂණික දැනුම හුවමාරු කරගැනීමටද කැමැත්ත පළ කර තිබේ.
ශ්‍රී ලංකාවට ස්වෛරී AI තාක්ෂණය පුළුල්ව භාවිත කිරීමට අවශ්‍ය යටිතල පහසුකම් සංවර්ධනය කිරීම සහ පුරවැසියන්ගේ දත්ත ආරක්ෂාව තහවුරු කිරීමේ වැදගත්කමද මෙහිදී සාකච්ඡා වී ඇත.
ඩිජිටල් සහයෝගීතාව පිළිබඳ කෙටුම්පත් අවබෝධතා ගිවිසුමක් අදාළ රාජ්‍ය ආයතනවල උපදෙස් අනුව සකස් කරමින් පවතින බව ඩිජිටල් ආර්ථික අමාත්‍යාංශයේ ලේකම් වරුණ ශ්‍රී ධනපාල මහතා සඳහන් කර තිබේ.
මෙම සාකච්ඡාවට ඩිජිටල් ආර්ථිකය පිළිබඳ ජනාධිපති ජ්‍යෙෂ්ඨ උපදේශක ආචාර්ය හාන්ස් විජයසූරිය මහතා ඇතුළු ශ්‍රී ලංකා සහ චීන නියෝජිතයෝ පිරිසක්ද සහභාගී වූහ.
