කොළඹ වරාය නගරයේ ආයෝජන ප්‍රවර්ධනය කිරීමේ අරමුණින් ඇමෙරිකානු ඩොලර් බිලියන 1.12ක වටිනාකමකින් යුත් ඉඩම් කොටස් නවයක් වසර 99ක කාලයක් සඳහා බදු දී ඇති බව නිලධාරීහු පවසති.
පාර්ලිමේන්තුවේ රාජ්‍ය මුදල් පිළිබඳ කාරක සභාවේදී මේ බව අනාවරණය වී තිබේ. තවත් ඇමෙරිකානු ඩොලර් බිලියනයක පමණ වටිනාකමකින් යුත් ඉඩම් කොටස් හයක් බදු දීම සඳහා සැලසුම් සකස් කරමින් පවතින බවද නිලධාරීහු සඳහන් කළහ.
මේ දක්වා බදු දී ඇත්තේ CHEC Port City Colombo (Pvt) Ltd සමාගමට අයත් ඉඩම් කොටස් පමණක් බවද එහිදී ප්‍රකාශ වී තිබේ. රජයට අයත් ඉඩම් කොටස් හතරක් වෙළෙඳපොළට ඉදිරිපත් කිරීමටද කොමිෂන් සභාව සූදානම් වෙයි.
බදු දෙන ඉඩම්වල වර්ග මීටරයක සාමාන්‍ය වටිනාකම ඇමෙරිකානු ඩොලර් 3,000ක් බවත්, මේ දක්වා බදු ගනුදෙනුවලින් කොමිෂන් සභාවට ලැබී ඇති මුදල රුපියල් මිලියන 398ක් බවත් නිල වාර්තාවේ සඳහන් වේ. එම මුදල සමස්ත බදු ගෙවීම්වලින් සියයට එකකට සමාන බවද වාර්තා වේ.
වරාය නගරයේ ආයෝජනය කරන සමාගම්වල ප්‍රතිලාභී හිමිකාරීත්වය හඳුනා ගැනීම, විදේශීය ආයෝජනවල විනිවිදභාවය තහවුරු කිරීම සහ මුදල් විශුද්ධිකරණය වැළැක්වීම සඳහා පවතින නියාමන ක්‍රමවේද පිළිබඳවද කාරක සභාවේදී සාකච්ඡා කර තිබේ.
එමෙන්ම, කොමිෂන් සභාවේ නිර්දේශ මත විදේශිකයන් සඳහා වීසා 14,300ක් පමණ නිකුත් කර ඇති බවට ඉදිරිපත් වූ තොරතුරු සලකා බලමින්, ඔවුන්ගේ කටයුතු නිසි ලෙස අධීක්ෂණය කිරීමේ හැකියාව පිළිබඳවද අවධානය යොමු වී ඇත.
