සාමාන්‍ය විදුලි සංදේශ ජාල ඔස්සේ අන්තර්ජාල සබඳතා ලබාගැනීමට අපහසු පාසල් 334ක් සඳහා Wi-Fi පහසුකම් ලබාදීමේ වගකීම පෞද්ගලික ආයතනයකට පවරා ඇති බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයීය උපදේශක කාරක සභාවේදී අනාවරණය විය. භූගෝලීය දුෂ්කරතා හේතුවෙන් සාමාන්‍ය ක්‍රමවලින් අන්තර්ජාල පහසුකම් සැපයිය නොහැකි පාසල් 10කට චන්ද්‍රිකා තාක්ෂණය ඔස්සේ අන්තර්ජාල පහසුකම් ලබාදීමටද අපේක්ෂා කෙරේ.
අධ්‍යාපන ක්ෂේත්‍රයේ ගැටලු සම්බන්ධයෙන් පැවැති කාරක සභා රැස්වීමේදී ඒවාට කඩිනම් විසඳුම් ලබාදෙන ලෙස අග්‍රාමාත්‍ය සහ අධ්‍යාපන අමාත්‍ය ආචාර්ය හරිනි අමරසූරිය මහත්මිය නිලධාරීන්ට උපදෙස් දුන්නාය. පාසල්වල පානීය ජලය හා සනීපාරක්ෂක පහසුකම් සඳහා වෙන් කළ මුදල් නියමිත කාලය තුළ ප්‍රයෝජනයට ගැනීම සහතික කිරීමට දිස්ත්‍රික් හා ප්‍රාදේශීය මට්ටමින් ප්‍රගතිය අධීක්ෂණය කරන ලෙසද ඇය දැනුම් දුන්නාය.
තෝරාගත් ප්‍රාථමික පාසල් 169ක් සංවර්ධනය කිරීමේ ව්‍යාපෘතියේ ප්‍රගතියද මෙහිදී සමාලෝචනය කෙරිණි. ප්‍රමාද වී ඇති ඉංජිනේරු ඇස්තමේන්තු කඩිනම් කරන ලෙස පළාත් බලධාරීන්ට දැනුම් දුන් අතර, ප්‍රාථමික පාසල්වල එක් ශ්‍රේණියකට එක් සුහුරු පන්ති කාමරයක් පමණක් සීමා කරන ලෙස අග්‍රාමාත්‍යවරිය උපදෙස් දුන්නාය. නව ප්‍රාථමික පාසල් සැලසුම් කිරීමේදී දරුවන්ට මානසික සුවතාවයෙන් යුතුව කාලය ගත කළ හැකි විවේකාගාර සහ කියවීම් කාමර ඇතුළත් කිරීමේ අවශ්‍යතාවද අවධාරණය කෙරිණි.
