සංවිධානාත්මක අපරාධ වැළැක්වීමේ පනත් කෙටුම්පතේ ඇතැම් විධිවිධාන මඟින් පුද්ගලයන්ගේ කොණ්ඩා මෝස්තර, පච්ච සහ ඇඳුම් පැළඳුම් පදනම් කරගෙන ඔවුන් සංවිධානාත්මක අපරාධ කල්ලියක සාමාජිකයන් ලෙස සැලකීමේ අවදානමක් පවතින බව ජනාධිපති නීතිඥ සාලිය පීරිස් මහතා පවසයි.
ඔහු මේ බව සඳහන් කර ඇත්තේ සිය ෆේස්බුක් සටහනක් මඟිනි. ත්‍රස්තවාදය වැළැක්වීමේ පනත (PTA) වෙනුවට හඳුන්වාදීමට යෝජිත රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත (PSTA) මඟින් ඉවත් කිරීමට අපේක්ෂා කරන ඇතැම් විධිවිධාන, නව සංවිධානාත්මක අපරාධ වැළැක්වීමේ පනත් කෙටුම්පතට ඇතුළත් කර ඇති බවටද ඔහු විවේචනය කර තිබේ.
සාලිය පීරිස් මහතාගේ අදහස අනුව, සහකාර පොලිස් අධිකාරී තනතුරට ඉහළ නිලධාරීන් ඉදිරියේ සිදුකරන පාපෝච්චාරණ සාක්ෂි ලෙස පිළිගැනීමට අදාළ ප්‍රතිපාදන නැවත ඇතුළත් කිරීම බරපතළ ගැටලුවකි. එවැනි ප්‍රතිපාදන අතීතයේදී වධහිංසා සහ අමානුෂික සැලකීම් සම්බන්ධ අවදානම් සමඟ බැඳී තිබූ බව ඔහු පෙන්වා දෙයි.
එමෙන්ම, නව කෙටුම්පත යටතේ ඇප ලබාගැනීමේ සීමා සහ අත්අඩංගුවට ගත් පුද්ගලයන් රක්ෂිත බන්ධනාගාරගත කිරීම සම්බන්ධ ප්‍රතිපාදන පිළිබඳවද ඔහු ප්‍රශ්න මතු කර ඇත. සැකකරුවෙකුට එරෙහි සාක්ෂි නොමැති අවස්ථාවක පවා අත්අඩංගුවට ගැනීමේ පදනම මත රක්ෂිත බන්ධනාගාරගත වීමේ අවදානමක් ඇති බව ඔහුගේ සටහනේ සඳහන් වේ.
මෙම විවේචන ඉදිරිපත් වන්නේ සංවිධානාත්මක අපරාධ මැඩලීම සඳහා නව නීතිමය රාමුවක් සකස් කිරීමේ පසුබිමකය. කෙසේ වෙතත්, පනත් කෙටුම්පතේ නිශ්චිත වගන්ති, ඒවායේ නීතිමය අර්ථය සහ අධිකරණය ඒවා ක්‍රියාත්මක කරන ආකාරය සලකා බැලීමෙන් තොරව, දිගු කොණ්ඩයක් හෝ පච්චයක් තිබීම පමණක් නිසා පුද්ගලයෙකු අත්අඩංගුවට ගෙන සිරගත කළ හැකි බව නිශ්චිතව ප්‍රකාශ කළ නොහැකිය.
