පූජ්‍ය ගලබොඩඅත්තේ ඥානසාර ස්වාමීන් වහන්සේගේ චීවරය ඉවත් කිරීම සම්බන්ධයෙන් සමාජය තුළ දැඩි කතාබහක් නිර්මාණය වී ඇති පසුබිමක, බන්ධනාගාරගත කරනු ලබන බෞද්ධ භික්ෂූන් වහන්සේලාගේ චීවරය අභිමානවත් ලෙස පවත්වාගෙන යාම පිළිබඳ වැදගත් තීරණ කිහිපයකට බුද්ධශාසන සභාව එළඹ තිබේ. බුද්ධශාසන, ආගමික හා සංස්කෘතික කටයුතු අමාත්‍යාංශයේ “දහම්පය” පරිශ්‍රයේදී ත්‍රෛනිකායික මහා සංඝරත්නයේ පාර්ශ්ව 31 නියෝජනය වන පරිදි උන්වහන්සේලාගේ සහ අමාත්‍ය ආචාර්ය හිනිදුම සුනිල් සෙනෙවි මහතා ඇතුළු නිලධාරීන්ගේ ප්‍රධානත්වයෙන් පැවැති විශේෂ සාකච්ඡාවකදී මෙම තීන්දු තීරණ ප්‍රකාශයට පත් කරන ලදී. ඒ අනුව බන්ධනාගාර ගත කර සිටින භික්ෂූන් වහන්සේ නමක් නැවත අධිකරණයට ඉදිරිපත් කිරීමේදී හෝ වෙනත් කටයුත්තක් සඳහා බැහැරට ගෙන යාමේදී චීවරය සහිතව ගෙන යාම සම්බන්ධයෙන් වන පනත් සංශෝධන යෝජනාවලියට මහා සංඝරත්නයේ නිරවුල් අනුමැතිය හිමිව ඇත.
ජනාධිපතිවරයා විසින් පත්කරන ලද විශේෂ කමිටුවේ සභාපති, බුද්ධශාසන අමාත්‍යාංශයේ ලේකම් ප්‍රින්ස් සේනාධිර මහතා විසින් ඉදිරිපත් කරන ලද යෝජනාවලියට අනුව, අදාළ නිකාය පාර්ශ්වයේ හෝ සංඝ සභාවේ නිර්දේශ මත පදනම්ව භික්ෂූන් වහන්සේලාගේ චීවරය ආරක්ෂා වන පරිදි කටයුතු කිරීමට අදාළ නීතිමය වගන්ති සංශෝධනය කිරීමට සැලසුම් කර ඇත. විශේෂයෙන්ම බන්ධනාගාර පනතේ 356 සහ 550 වගන්ති සංශෝධනය කිරීමට ගෙන ආ යෝජනා පිළිබඳව මහා සංඝරත්නය සවිස්තරාත්මකව දැනුවත් කර ඇති අතර, භික්ෂු පරම්පරාවේ ගෞරවය සහ සම්ප්‍රදායන් ආරක්ෂා කරගනිමින් රාජ්‍ය නීතිය ක්‍රියාත්මක කිරීමේ වැදගත්කම මෙහිදී දැඩි ලෙස අවධාරණය විය.
මෙම කමිටු නිර්දේශ ප්‍රායෝගිකව භාවිත කිරීම සඳහා ත්‍රෛනිකායික මහා සංඝරත්නය සහ සියලු සංඝ සභාවන් එක්ව ඉදිරියේදී පොදු වැඩපිළිවෙළක් සකස් කිරීමට නියමිත අතර, මෙය ශ්‍රී ලංකාවේ බෞද්ධ ශාසනික ඉතිහාසයේ සහ අධිකරණ ක්‍රියාවලියේ තීරණාත්මක සන්ධිස්ථානයක් වනු ඇත. රාජ්‍ය පාලනය සහ සම්බුද්ධ ශාසනයේ ගෞරවය අතර සමබරතාව රැකගනිමින් ඉදිරියට ගෙන යන මෙම නීතිමය සහ සංස්කෘතිකමය ප්‍රතිසංස්කරණ, ඉදිරි කාලයේදී භික්ෂූන් වහන්සේලා සම්බන්ධ නීතිමය කටයුතුවලදී හටගන්නා අර්බුදකාරී තත්ත්වයන් වළක්වා ගැනීමට මහෝපකාරී වනු ඇතැයි අපේක්ෂා කෙරේ.
