රට තුළ ක්‍රියාත්මක ‘රටම එකට’ ජාතික මෙහෙයුමේ පුළුල් වැටලීම් සහ මෙහෙයුම් හරහා මෙරට මත්ද්‍රව්‍ය ජාලයට සම්බන්ධ සැකකරුවන් 322,218 දෙනෙකු නීතියේ රැහැනට හසුකර ගැනීමට ආරක්ෂක අංශ සමත්ව ඇති බව කැබිනට් ප්‍රකාශක, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ප්‍රකාශ කර තිබේ. රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවේදී මෙම සංඛ්‍යා ලේඛන අනාවරණය වූ අතර, පසුගිය වසරක පමණ කාලය තුළ හෙරොයින්, අයිස්, කොකේන් සහ ගංජා ඇතුළු මත්ද්‍රව්‍ය කිලෝග්‍රෑම් දහස් ගණනක් මෙලෙස අත්අඩංගුවට ගෙන ඇත. රටේ අනාගත පරපුර විනාශ මුඛයට ඇද දමන සංවිධානාත්මක මත්ද්‍රව්‍ය ජාලය සහ ජාවාරම්කරුවන් මැඩලීම සඳහා රජය ගෙන යන මෙම අඛණ්ඩ මර්දනකාරී වැඩපිළිවෙළ ජාතික ආරක්ෂාව සහ සමාජ ස්ථාවරත්වය තහවුරු කිරීමේ තීරණාත්මක පියවරක් ලෙස සැලකේ.
ගත වූ කාලසීමාව තුළ සිදු කරන ලද වැටලීම්වලදී හෙරොයින් කිලෝග්‍රෑම් 2,485ක් සහ අයිස් මත්ද්‍රව්‍ය කිලෝග්‍රෑම් 3,032කට අධික ප්‍රමාණයක් අත්අඩංගුවට ගෙන ඇති අතර, නීතිවිරෝධී වත්කම් සම්බන්ධයෙන් සැකකරුවන් 449 දෙනෙකුට එරෙහිව විමර්ශන ආරම්භ කර තිබීම විශේෂත්වයකි. මීට අමතරව, රැඳවුම් නියෝග මත ප්‍රශ්න කිරීම් සහ පුනරුත්ථාපන මධ්‍යස්ථාන වෙත සැකකරුවන් යොමු කිරීමේ ක්‍රමවේදය ද ක්‍රියාත්මක කර ඇති අතර, වරදකරුවන්ට එරෙහි නීතිමය ක්‍රියාදාමය වඩාත් විධිමත් කිරීමේ අත්‍යවශ්‍යතාව මින් මනාව පැහැදිලි වේ. මත්ද්‍රව්‍ය ජාවාරම්කරුවන්ගේ ජාල බිඳ දැමීම මෙන්ම ඔවුන්ගේ නීතිවිරෝධී ආර්ථික පදනම අඩපණ කිරීම අරමුණු කරගත් මෙම බහුවිධ උපායමාර්ගය මඟින් අපරාධ මර්දන යාන්ත්‍රණයට නව ශක්තියක් එක්වී ඇත.
විෂ මත්ද්‍රව්‍ය ග්‍රෑම් 100ක් දක්වා වූ ප්‍රමාණ සම්බන්ධ නඩු කටයුතු සෘජුවම මහාධිකරණය හමුවේ විභාග කිරීමට හැකි වන පරිදි අදාළ පනත සංශෝධනය කිරීමේ තීරණාත්මක පියවරක් ගෙන ඇති අතර, එම සංශෝධනය අද (22) දිනයේ පාර්ලිමේන්තුවට ඉදිරිපත් කිරීමට නියමිතය. මෙම ව්‍යවස්ථාදායක සංශෝධනය හරහා නීතිමය ක්‍රියාවලියේ පවතින ප්‍රමාදයන් අවම වී බරපතළ මත්ද්‍රව්‍ය අපරාධකරුවන්ට එරෙහි දඬුවම් කඩිනම් වනු ඇති බව අපේක්ෂා කෙරේ. පුළුල් සමාජ ප්‍රතිසංස්කරණ සහ නීතියේ දැඩි ක්‍රියාත්මක වීම හරහා මත්ද්‍රව්‍ය උවදුරෙන් රට මුදා ගැනීමට රජය ගෙන යන මෙම මෙහෙයුම් ඉදිරියේදී තවදුරටත් තීව්‍ර වනු ඇත.
