අඩු ආදායම්ලාභී වාහන හිමියන් ඉන්ධන මිල ඉහළ යාමේ බලපෑමෙන් ආරක්ෂා කරගැනීම වෙනුවෙන් ආරම්භ කළ ඩිජිටල් සහන ව්‍යාපෘතිය යටතේ වාහන හිමියන් කෝටි 1.18ක් (මිලියන 11.83ක්) ලියාපදිංචි වී තිබේ. පාකිස්තාන මහ කොමසාරිස් කාර්යාලයේ මාධ්‍ය නිවේදනයකට අනුව මෙම තොරතුරු තහවුරු වේ.
ගෝලීය ඉන්ධන මිල ඉහළ යාම හමුවේ අඩු ආදායම්ලාභී මෝටර් රථ සහ වාහන හිමියන්ට සහන සැලසීම සඳහා පාකිස්තාන රජය විසින් ආරම්භ කරන ලද “අගමැති සහන ඉන්ධන වැඩසටහන” රට පුරා සාර්ථකව ක්‍රියාත්මක වෙමින් පවතී. 2026 ඔක්තෝබර් 14 වන දින වන විට ලැබී ඇති දත්තවලට අනුව මෙම වැඩසටහන යටතේ ලියාපදිංචි වී ඇති සමස්ත වාහන හිමියන්ගේ සංඛ්‍යාව කෝටි 1.18 ඉක්මවා ඇත.
පාකිස්තාන තොරතුරු තාක්ෂණ හා දුරකථන අමාත්‍යාංශයේ ඩිජිටල් යටිතල පහසුකම් ඔස්සේ සම්පූර්ණයෙන්ම විනිවිදභාවයෙන් යුතුව මෙම වැඩසටහන ක්‍රියාත්මක කෙරේ. මෙහිදී මෝටර් සයිකල් සහ ත්‍රිරෝද රථ හිමියන් කෝටි 1.14ක් ලියාපදිංචි වී ඇති අතර, ඔවුන්ට සතියක කාලයකට වලංගු වන පරිදි ටෝකනයකට පාකිස්ථාන රුපියල් 500ක සහනයක් හිමිවේ. එසේම 800cc දක්වා වූ කුඩා කාර් රථ හිමියන් ලක්ෂ 4.12ක් ලියාපදිංචි වී ඇති අතර, දින 10ක කාලයකට වලංගු ටෝකනයක් සඳහා පාකිස්රථාන රුපියල් 1,000ක සහනයක් හිමිවන බව ප්‍රකාශ කර ඇත.
මෙතෙක් නිකුත් කර ඇති ටෝකන කෝටි 2.76න් කෝටි 2.52ක් ජනතාව විසින් ඉන්ධන පිරවුම්හල් වෙත ඉදිරිපත් කර සාර්ථකව භාවිතා කර තිබේ. ඔක්තෝබර් 12 වන දින දක්වා ඉන්ධන පිරවුම්හල් වෙත ඉදිරිපත් කරන ලද හිමිකම් පෑම් 213,996ක් වෙනුවෙන් පාකිස්තානු රුපියල් කෝටි 1,234ක මුදලක් ගෙවා නිමකර ඇති අතර, මහජනතාව සඳහා 9771 සහ ඉන්ධන පිරවුම්හල් සඳහා 9772 ලෙස ක්‍රියාත්මක හදිසි ඇමතුම් අංක වෙත ලැබුණු පැමිණිලිවලින් පිළිවෙළින් 96.2%ක් සහ 98.4%ක් වැනි ඉහළ ප්‍රතිශතයක් සාර්ථකව නිරාකරණය කිරීමට පියවර ගෙන ඇත. ඩිජිටල් ක්‍රමවේදයක් ඔස්සේ සෘජුවම ප්‍රතිලාභියා වෙතම සහන ලබාදෙන මෙම ව්‍යාපෘතිය පාකිස්තාන ඉතිහාසයේ ක්‍රියාත්මක වූ විශාලතම සහ සාර්ථකම ඩිජිටල් සහන වැඩසටහන ලෙස සැලකේ.
