පාපන්දු ලෝකයේ විශිෂ්ට ක්‍රීඩකයෙකු වූ ඩියාගෝ මැරඩෝනාගේ මරණය සම්බන්ධ නඩුවේදී චෝදනා ලැබ සිටින වෛද්‍ය ලියෝපෝල්ඩෝ ලූක් නිර්දෝෂී බව ඔහුගේ නීතිඥයන් අධිකරණය හමුවේ ප්‍රකාශ කර තිබේ. තම සේවාදායකයා මෙම සිද්ධිය සම්බන්ධයෙන් “බිල්ලක්” බවට පත් කර ඇති බව ද ඔවුහු කියා සිටිති.
2020 නොවැම්බර් මාසයේදී මියගිය මැරඩෝනාගේ මරණය පූර්වයෙන් හඳුනාගත හැකිව තිබූ බවට නඩු පවරන්නන් ඉදිරිපත් කරන තර්කය ලූක්ගේ නීතිඥ රොබර්ටෝ රැලින් ප්‍රතික්ෂේප කළේය. තවත් ආරක්ෂක නීතිඥයෙකු වන ෆ්‍රැන්සිස්කෝ ඔනෙටෝ පැවසුවේ මැරඩෝනාගේ මරණය සිදුවූයේ පුරෝකථනය කළ නොහැකි හදිසි හෘදයාබාධයක් හේතුවෙන් බවයි.
මැරඩෝනාගේ මරණය සම්බන්ධයෙන් වෛද්‍ය ලූක්ට වසර 12ක සිරදඬුවමක් ලබාදෙන ලෙස නඩු පවරන්නන් ඉල්ලා තිබේ. ඔහු ඇතුළු සෞඛ්‍ය සේවා වෘත්තිකයන් හත්දෙනෙකුට එරෙහි නඩු විභාගය අප්‍රේල් මාසයේ සිට පැවැත්වෙයි. මැරඩෝනා සුවය ලබමින් සිටි කාලයේදී සිදුවූ බව කියන වෛද්‍ය නොසැලකිල්ල සම්බන්ධයෙන් ඔවුන්ට එරෙහිව චෝදනා ඉදිරිපත් වී ඇත.
මැරඩෝනා වයස අවුරුදු 60දී හෘද හා ශ්වසන පද්ධති අකර්මණ්‍ය වීම සහ පෙනහළුවල දියර එකතුවීම සම්බන්ධ තත්ත්වයක් හේතුවෙන් මියගියේය. හිස්කබල තුළ රුධිර එකතුවීමක් සඳහා ශල්‍යකර්මයකට ලක්වීමෙන් පසු සුවය ලබමින් සිටියදී, බුවනෝස් අයර්ස් නගරයට උතුරින් පිහිටි ටයිග්‍රේ ප්‍රදේශයේ නිවසක ඔහු මියගොස් සිටියදී හමුවිය.
නඩු පවරන්නන් විත්තිකරුවන් හයදෙනෙකුට වසර හතරේ සිට 12 දක්වා සිරදඬුවම් ඉල්ලා ඇති අතර, නඩුවේ අවසන් තීන්දුව මෙතෙක් ප්‍රකාශයට පත් කර නොමැත.
