බ්‍රිතාන්‍ය රජය, රාජ්‍ය අනුග්‍රහය ලබන ව්‍යාපාරික මූල්‍ය ආයතන දෙකක් සඳහා පවුම් බිලියන 20.4ක (ඇමෙරිකානු ඩොලර් බිලියන 27.3ක පමණ) අතිරේක ප්‍රාග්ධනයක් ලබාදීමට සැලසුම් කර ඇති බව Reuters වාර්තා කරයි.
Financial Times පුවත්පත භාණ්ඩාගාරයේ තොරතුරු උපුටා දක්වමින් වාර්තා කර ඇත්තේ, ඉදිරි වසර පහකට ආසන්න කාලය තුළ ජාතික ධන අරමුදලට (National Wealth Fund) පවුම් බිලියන 15.4ක් සහ බ්‍රිතාන්‍ය ව්‍යාපාරික බැංකුවට (British Business Bank) පවුම් බිලියන 5ක් වෙන් කිරීමට නියමිත බවයි.
කෘත්‍රිම බුද්ධිය, ආරක්ෂක කර්මාන්තය, හරිත බලශක්තිය, යටිතල පහසුකම් සහ ආර්ථික වර්ධනයට දායක වන අනෙකුත් ක්ෂේත්‍රවල ව්‍යාපාර සඳහා ආයෝජන සහාය සැපයීම මෙම වැඩපිළිවෙළේ අරමුණ බව සඳහන් වේ.
මෙම අරමුදල් මඟින් 2035 වසර වන විට රැකියා ලක්ෂයකට පමණ සහාය ලැබෙනු ඇතැයි බ්‍රිතාන්‍ය භාණ්ඩාගාරය පවසා ඇති බව ද වාර්තාවේ දැක්වේ.
මෙම යෝජනා බ්‍රිතාන්‍යයේ ඉදිරි අයවැයෙන් ප්‍රකාශයට පත් කිරීමට අපේක්ෂා කරන නමුත්, Reuters වාර්තාව පළ වූ අවස්ථාවේදී ඒ පිළිබඳ නිල නිවේදනයක් නිකුත් වී නොතිබුණි.
