ඇමරිකාවේ ජෝර්ජියා ප්‍රාන්තයේ සික්ස් ෆ්ලැග්ස් ඕවර් ජෝර්ජියා විනෝද උද්‍යානයේ සිදුවූ මාරාන්තික රෝලර් කෝස්ටර් අනතුරෙන් පසු, ‘ගොලියාත්’ ඇතුළු සමාන ආරක්ෂක පද්ධති සහිත රෝලර් කෝස්ටර් සඳහා අමතර ආසන පටි සවි කිරීමට සික්ස් ෆ්ලැග්ස් සමාගම තීරණය කර තිබේ.
ඔක්තෝබර් 12 වැනිදා සිදුවූ අනතුරෙන් ජීවිතක්ෂයට පත්වූයේ ඇට්ලන්ටාහි පදිංචි 42 හැවිරිදි හසන් ජිහාඩ් ඉබ්න් කරීම් ය. පොලිසියේ මූලික විමර්ශන තොරතුරු අනුව, රෝලර් කෝස්ටරය ධාවනය වෙමින් තිබියදී ඔහු ආසනයෙන් ඉවතට විසිවී අනෙකුත් මගීන්ගේ ගැටීමෙන් පසු බිමට වැටී තිබේ. තවත් කිහිපදෙනෙකු තුවාල ලබා ඇති අතර, ඒ අතර බාලවයස්කරුවන් සිව්දෙනෙකු ද සිටින බව වාර්තා වේ.
සික්ස් ෆ්ලැග්ස් ප්‍රධාන විධායක නිලධාරී ජෝන් රෙයිලි පවසා ඇත්තේ, උද්‍යානවල ආරක්ෂාව තවදුරටත් ශක්තිමත් කිරීම සඳහා අමතර ආරක්ෂක පියවර ගන්නා බවයි. ස්වාධීන ඉංජිනේරුවන් සහ විනෝද යන්ත්‍ර පරීක්ෂණ විශේෂඥයන් යොදාගෙන ආරක්ෂක ක්‍රියාපටිපාටි ද සමාලෝචනය කිරීමට සමාගම පියවර ගෙන තිබේ.
අනතුර සම්බන්ධයෙන් බලධාරීන්ගේ විමර්ශන තවදුරටත් ක්‍රියාත්මක වන අතර, ‘ගොලියාත්’ ඇතුළු සමාන රෝලර් කෝස්ටර් කිහිපයක් තාවකාලිකව වසා දමා ඇත.
