ඇමරිකා එක්සත් ජනපදයෙන් පිටත පිහිටුවන පළමු පැට්‍රියට් (Patriot) ගුවන් ආරක්ෂක මිසයිල නඩත්තු මධ්‍යස්ථානය පෝලන්තයේ ස්ථාපිත කිරීමට නියමිත බව එරට රජය ප්‍රකාශ කර තිබේ.
පෝලන්ත නියෝජ්‍ය ආරක්ෂක අමාත්‍ය මග්ඩලේනා සොබ්කොවියාක්-චාර්නෙකා සඳහන් කළේ, මෙම ව්‍යාපෘතිය සඳහා පෝලන්තය තෝරාගෙන ඇති බවයි. ජර්මනිය, නෙදර්ලන්තය සහ නෝර්වේ යන රටවල් ද යුරෝපීය මධ්‍යස්ථානය පිහිටුවීම සඳහා තරග කළ බව ඇය ප්‍රකාශ කර තිබේ.
මෙම ආයෝජනයේ වටිනාකම පෝලන්ත ස්ලොටි බිලියනයක් පමණ වන අතර, එය ඇමරිකානු ඩොලර් මිලියන 253කට ආසන්න වේ. මධ්‍යස්ථානය මෙහෙයුම් සඳහා සූදානම් කිරීමට මාස 12ක් පමණ ගතවනු ඇතැයි අපේක්ෂා කෙරේ.
යුක්රේනයේ සහ මැදපෙරදිග පවතින යුද ගැටුම් හේතුවෙන් ගුවන් ආරක්ෂක මිසයිල සඳහා ඇති ඉල්ලුම ඉහළ ගොස් ඇති අතර, සැපයුම් ප්‍රමාදයන් ද ඇති වී තිබේ. යුරෝපයේ නඩත්තු මධ්‍යස්ථානයක් පිහිටුවීමෙන් මිසයිල අලුත්වැඩියා කිරීම සඳහා ඒවා ඇමරිකාවට යැවීමට සිදුවන කාලය අඩු කරගත හැකි වනු ඇතැයි අපේක්ෂා කෙරේ.
මෙම මධ්‍යස්ථානය පිහිටුවීමෙන් යුරෝපයේ පැට්‍රියට් ගුවන් ආරක්ෂක පද්ධති නඩත්තු කිරීමේ හැකියාව වැඩිදියුණු කිරීමට ද හැකි වනු ඇත.
