එක්සත් ජනපද නියෝජිත මන්ත්‍රී මණ්ඩලයේ අධිකරණ කමිටුවේ ඩිමොක්‍රටික් පක්ෂ සාමාජිකයින් විසින් ප්‍රකාශයට පත් කරන ලද පිටු 53ක විශේෂ විමර්ශන වාර්තාවක් හරහා, ඇමරිකානු ජනාධිපති ඩොනල්ඩ් ට්‍රම්ප්ට එරෙහිව හිටපු ස්විට්සර්ලන්ත රූ රැජිනක වන බියට්‍රිස් කියුල් විසින් අතිශය ආන්දෝලනාත්මක දූෂණ චෝදනාවක් එල්ල කර තිබේ. 1993 නොවැම්බර් මාසයේදී නිව්යෝර්ක් හි ප්ලාසා හෝටලයේදී ට්‍රම්ප් විසින් තමන්ව ‘ම්ලේච්ඡ’ ලෙස දූෂණය කළ බවත්, එම අවස්ථාවේදී තම ඇඳුම් ඉරී ගොස් ශරීරයේ ස්ථාන කිහිපයකින් ලේ ගැලීම් සහ තැලීම් පවා සිදු වූ බවත් කියුල් අනාවරණය කර ඇත. ජෙෆ්රි එප්ස්ටයින් සමඟ පැවැති ලිංගික ජාවාරම් සබඳතා පිළිබඳ කෙරෙන පරීක්ෂණ අතරතුර මතුවූ මෙම හෙළිදරව්ව ධවල මන්දිරය විසින් වහාම ප්‍රතික්ෂේප කර ඇත්තේ, එය ඉදිරි කොංග්‍රස් මැතිවරණය ඉලක්ක කරගනිමින් ඩිමොක්‍රටික් පාක්ෂිකයින් විසින් ගෙන යන මංමුලා සහගත දේශපාලන ප්‍රචාරණයක් ලෙස හංවඩු ගසමිනි.
එප්ස්ටයින්ගේ කුප්‍රකට ලිංගික ජාවාරම් ජාලය සහ ඩොනල්ඩ් ට්‍රම්ප් අතර පැවැති සබඳතා පිළිබඳ විමර්ශනය කළ ඩිමොක්‍රටික් සභිකයින් පෙන්වා දෙන්නේ, ට්‍රම්ප්ට එරෙහිව කාන්තාවන් පස් දෙනෙකුගෙන් මෙවැනිම ආකාරයේ ලිංගික අතවර සහ දූෂණ චෝදනා එල්ල වී ඇති බවයි. අදාළ සිදුවීමෙන් පසු තමන්ට වීසා බලපත්‍ර සහ නිව්යෝර්ක් විශ්වවිද්‍යාලයට (NYU) ඇතුළත් වීමේ පහසුකම් ලබාදෙන බවට පවසමින් සිද්ධිය වසන් කිරීමට ට්‍රම්ප් උත්සාහ කළ බවට ද කියුල් චෝදනා කරයි. මේ අතර, අධිකරණ දෙපාර්තමේන්තුව ජනාධිපතිවරයා ආරක්ෂා කිරීම සඳහා මෙම අපරාධ වසන් කිරීමට ක්‍රියා කරන බවට චෝදනා කරන ඩිමොක්‍රටික් පක්ෂය, ට්‍රම්ප් සහ එප්ස්ටයින් අතර සබඳතා පිළිබඳ පරීක්ෂණ පැවැත්වීමට ස්වාධීන විශේෂ උපදේශකයෙකු පත් කරන ලෙස ඉල්ලා සිටී.
නොවැම්බර් 3 වනදා පැවැත්වීමට නියමිත තීරණාත්මක කොංග්‍රස් මැතිවරණය ආසන්නයේ එල්ල වූ මෙම දැවැන්ත චෝදනාව ඇමරිකානු දේශපාලන කරළිය උණුසුම් කිරීමට හේතු වී තිබේ. ඩිමොක්‍රටික් පාක්ෂිකයින් විසින් එප්ස්ටයින්-ට්‍රම්ප් සබඳතා ඉලක්ක කර ගනිමින් ඩොලර් මිලියන 35ක ප්‍රචාරක ව්‍යාපාරයක් දියත් කර ඇති පසුබිමක, මෙම විමර්ශන වාර්තාව සහ ඊට එරෙහිව රිපබ්ලිකන් පක්ෂයේ දැඩි ප්‍රතිචාර ඉදිරි මැතිවරණ ප්‍රතිඵල කෙරෙහි මෙන්ම ධවල මන්දිරයේ ඉදිරි දේශපාලන ස්ථාවරත්වයට තීරණාත්මක බලපෑමක් එල්ල කරනු ඇතැයි විදේශ විශ්ලේෂකයෝ පෙන්වා දෙති.
