රට තුළ වර්තමානයේ ක්රියාත්මක වන විවිධ සංවර්ධන සංග‍්‍රාමයන් වෙනුවෙන් සංවර්ධන ලොතරැයි මණ්ඩලය විසින් “සංවර්ධන වාසනාව” විශේෂ ලොතරැයියක් පසුගියදා වෙළදපලට නිකුත් කෙරුණි. ඌව වෙල්ලස්ස සංවර්ධනය සනිටුහන් කරමින් මොණරාගල පවත්වන ගම්පෙරළිය ප‍්‍රදර්ශනයට සමගාමීව මෙම ලොතරැයිපත අලෙවි කිරීමේ කටයුතු සැලසුම් කර ඇති බව සංවර්ධන ලොතරැයි මණ්ඩලය තවදුරටත් සදහන් කරයි.
ජනාධිපති මෛත්‍රිපාල සිරිසේන මහතාගේ සංකල්පයක් අනුව දිළිදුකම පිටුදැකීමේ අරමුණින් ආරම්භ කරන ලද ග‍්‍රාම ශක්ති ව්‍යාපාරය සහ අග‍්‍රාමාත්‍ය රනිල් වික‍්‍රමසිංහ මහතාගේ මගපෙන්වීම අනුව මුදල් හා ජනමාධ්‍ය අමාත්‍යංශයේ මූලිකත්වයෙන් ක්රියාත්මක වන Vision 2025, එන්ටර්ප්‍රයිස් ශ්‍රී ලංකා වැඩසටහන හා ගම්පෙරළිය සංවර්ධන සංග‍්‍රාමය පාදක කරගනිමින් මෙම විශේෂ ලොතරැයිපත සංවර්ධන ලොතරැයි මණ්ඩලය විසින් නිකුත් කර ඇත.
මෙම ටිකට්පත එළිදැක්වීම පසුගිය 21 වනදා මුදල් හා ජනමාධ්‍ය අමාත්‍ය මංගල සමරවීර මහතා අතින් මුදල් අමාත්‍යංශයේදී සිදුකෙරැණි. මෙම ටිකට්පත් නිකුත් කිරීමේ අවස්ථාවට සංවර්ධන ලොතරැයි මණ්ඩලයේ සභාපති එස් ඒ පී සූරියප්පෙරුම මහතා සහ ක්‍රියාකාරී අධ්‍යක්ෂ එච් ආර් විමලසිරි මහතා ඇතුලු නිළධාරීන් සහභාගී විය.
වසර ගණනාවක් ජනතා විශ්වාසය දිනාගනිමින් ජනප්‍රියත්වයට පත්ව තිබෙන සංවර්ධන වාසනාව ලොතරැයියේ මෙම විශේෂ දිනුම් ඇදීම තුළින් රුපියල් කෝටියකින් පටන්ගන්නා සුපිරි ජයමල්ල ඇතුලු මුදල් ත්‍යාග , ස්වර්ණ තිළිණ ත්‍යාග වලට අමතරව වටිනා වැගන් ආර් මෝටර් රථයක් සහ ස්කූටි රථ තුනක් දිනා ගැනීමට අවස්ථාව හිමිකර දී ඇත.
එළඹෙන සැප්තැම්බර් 27 වනදා දිනුම් ඇදීමට නියමිත මෙම විශේෂ දිනුම් ඇදීමේ ටිකට්පත හරහා ඔබට වාසනාවත් රටේ සංවර්ධන සංග්‍රාමයට ශක්තියත් උදා කරදීම සංවර්ධන ලොතරැයි මණ්ඩලයේ අරමුණයි.
