තම ප‍්‍රතිපත්ති ප‍්‍රකාශයේ ප‍්‍රමුඛත්වයක් ලබාදුන් අධ්‍යාපන ක්ෂේත‍්‍රයේ උන්නතිය සඳහා වූක්‍රියාමාර්ග කඩිනමින් සිදු කළයුතු බව ජනාධිපති ගෝඨාභය රාජපක්ෂ පවසයි.
ජනාධිපතිවරයා මේ බව පැවසුවේ ඊයේ (05) අධ්‍යාපන හා උසස් අධ්‍යාපන ඇමතිවරු සහ ආයතන නිලධාරින් සමඟ ජනාධිපති කාර්යාලයේ පැවති විශේෂ සාකච්ඡාවේ දීය. මඩකලපුව විශ්වවිද්‍යාලය විනාශ වී යාමට ඉඩ නොදී හැකි ඉක්මණින් ජාතික විශ්වවිද්‍යාල පද්ධතියට එකතුකර ජාතික සම්පතක් ලෙස ප‍්‍රයෝජනයට ගැනීමේ වැදගත්කම ද ජනාධිපති පෙන්වා දුන්නේය.
තාක්ෂණය මුල් වූ ලෝක ආර්ථිකය සඳහා නිපුණතා සහිත දරු පරපුරක් ලොවට දායාද කළ හැකි අධ්‍යාපන ක‍්‍රමයකට කඩිනමින් ගමන් කළයුතුය. එහිදී විභාගය කේන්ද්‍රකරගත් අධ්‍යාපන ක‍්‍රමවේදයෙන් මිදී දරුවන්ගේ කර මත පැටවී ඇති ඉසිළිය නොහැකි බර ඉවත්වන ආකාරයේ පසුබිමක් සැකසියයුතු බව ජනාධිපතිවරයා අවධාරණය කළේය.
එහිදී රටේ අවශ්‍යතාව මෙන්ම අන්තර් ජාතික මට්ටමේ විෂය නිර්දේශ හා විෂය මාලාවන් සැකසී ඇති ආකාරය පිළිබඳව අවධානය යොමු කිරීමේ ඇති වැදගත්කම ද පැහැදිළි කෙරිණි.
අධ්‍යාපනයට අදාළ තීරණ ගැනීම දේශපාලනයෙන් බැහැරව අධ්‍යාපනඥයින් විසින් සිදු කිරීමේ වැදගත්කම ද ජනාධිපතිවරයා පෙන්වා දුන්නේය.
රැකියා විරහිත උපාධිධාරින් පුරප්පාඩු ඇති ආයතනවලට ගැළපෙන අයුරින් පුහුණුකර ඒ සඳහා යොමු කිරීමට කඩිනමින් පියවර ගතයුතු බව ද ජනාධිපතිවරයා පැවසීය.
2018 වසරේ උසස් පෙළ සමත් දරුවන් හැකි ඉක්මණින් විශ්ව විද්‍යාලවලට ඇතුලත් කිරීමට පියවර ගත යුතුව ඇත. එමෙන්ම 2019 වසරේ සිට උසස් පෙළ ප‍්‍රතිඵල නිකුත් වී කෙටි කාලයක් තුළ දරුවන් වීශ්ව විද්‍යාල වලට බඳවා ගැනීමට ක්‍රියා කළ යුතුව ඇති බව ද ජනාධිපතිවරයා අවධාරණය කළේය.
උසස් පෙළ සමත් සැම දරුවකුටම විශ්ව විද්‍යාල වරම් හිමි කර ගැනීමට හැකි සෑම අවස්ථාවක්ම ලබාදිය යුතුව තිබේ. එමෙන්ම කෙටි කාලීන වශයෙන් රටට අවශ්‍ය ශ‍්‍රම බලකාය බිහි කිරීමට විශ්ව විද්‍යාල පද්ධතිය තුළ ඩිප්ලෝමා පාඨමාලා ඇති කිරීම පිළිබඳව ද මෙහිදී අවධානය යොමුවිය.
රැකියා වෙළෙඳ පොළ ඉලක්ක කර ගනිමින් ගුරු විද්‍යාපීඨ, හෝටල් පාසල්‍ ආරම්භ කිරීමට ක්‍රියා කළ යුතුව ඇති බව ද ජනාධිපතිවරයා සඳහන් කළේය.
රටේ අවශ්‍යතාව සොයා බලා පාඨමාලා සකස් කිරීමේ අවස්ථාව විශ්ව විද්‍යාල වෙත ලබාදී මට කාලය එලැඹ තිබේ. ඒ සඳහා විශ්වවිද්‍යාල දිරිමත් කළයුතු අතර බොරු න්‍යායන්ගෙන් ඉවත්ව අධ්‍යාපන ක්ෂේත‍්‍රය නගා සිටුවීමට ක්‍රියා කළයුතු බව ජනාධිපතිවරයා සඳහන් කළේය.
ගාල්ල, මාතර, හම්බන්තොට මෙන්ම සෑම දිස්ත්‍රික්කයක්ම ආවරණය වන පරිදි විශ්ව විද්‍යාල ආරම්භ කිරිමේ වැදගත්කම මෙහිදී සාකච්ඡාවට ලක්විය. ඒ සඳහා විශාල භූමි භාගයන්හි පිහිටා ඇති ප‍්‍රයෝජනයට නොගත් ගොඩනැඟිලි ප‍්‍රතිසංස්කරණය කර යොදා ගැනීමේ හැකියාව ද සොයා බැලිය යුතු බව ජනාධිපතිවරයා පෙන්වා දුන්නේ ය.
විද්‍යා හා ගණිත අංශයන්ගෙන් වැඩි දරු පිරිසක් රටට දායාද කළ යුතුව තිබේ. කලා අංශයෙන් අධ්‍යාපනය ලබන අය කෙටි කාලයකින් තොරතුරු තාක්ෂණ දැනුම සමඟ මුසුකර ආර්ථික ක්‍රියාවලියට එක් කර ගැනීම ද ඉතා වැදගත් බව ජනාධිපතිවරයා සඳහන් කළේය.
උසස් අධ්‍යාපනය සඳහා විදේශගත වන දරුවන්ට සිය අධ්‍යාපන කටයුතු රට තුළදිම ලබා ගැනීමට අවස්ථාව සලසා දිය යුතුය. ගුරු හිඟය පියවීමට පියවර ගැනීමටත්, පාසලක සිටිය යුතු ගුරුවරුන් පිරිස පුරප්පාඩු නොකර අනිවාර්යයෙන්ම පවත්වා ගෙනයාමට ක්‍රියාකළ යුතුය. අධ්‍යාපනක්ෂේත‍්‍රය වෙනුවෙන් වසරක් ඇතුළත ජාතික ප‍්‍රතිපත්තියක් සකස් කළයුතු බව ද මෙහිදී සාකච්ඡාවට ගැනිණි.
අමාත්‍ය බන්දුල ගුණවර්ධන, රාජ්‍ය අමාත්‍ය රංජිත් සියඹලාපිටිය යන මහත්වරු සහ අමාත්‍යාංශ ලේකම්වරු ඇතුළු නිලධාරින් රැසක් මෙම අවස්ථාවට එක්ව සිටියහ.
දිලිනි සමන්මලි
